• Актуальнае
  • Медыяправа
  • Карыснае
  • Накірункі працы і кампаніі
  • Агляды і маніторынгі
  • Рэкамендацыі па бяспецы калег

    Прысуд Ігару Карнею: 3 гады і 20 тысяч рублёў штрафу

    У Мінскім гарадскім судзе завяршыўся разгляд справы журналіста-фрылансера Ігара Карнея. Суддзя Сяргей Кацэр прызнаў журналіста вінаватым паводле часткі 3 артыкула 361–1 Крымінальнага кодэкса (удзел у экстрэмісцкім фарміраванні) і прыгаварыў да трох гадоў зняволення ў калоніі ва ўмовах агульнага рэжыму.

    Карней Ігар

    Ігар Карней. Фота: «Радыё Свабода»

    Cудовы працэс распачаўся 19 сакавіка, назаўтра было другое пасяджэнне, а 22 сакавіка ўжо прагучаў прысуд.

     У першы дзень судовага разбіральніцтва на знак салідарнасці з Карнеем і іншымі беларускімі журналістамі, зняволенымі за прафесійную дзейнасць, да будынка Мінскага гарадскога суда прыйшлі дыпламаты Еўрасаюза, Аўстрыі, Нідэрландаў, Славакіі, Швецыі, Германіі, Польшчы і Вялікабрытаніі. На гэта тут жа адрэагавалі дзяржаўныя медыі: у некалькіх СМІ з’явіліся артыкулы, дзе прыніжалася годнасць і падсуднага, і замежных дыпламатычных прадстаўнікоў.

     Ад моманту затрымання журналіста і да пачатку суда афіцыйна не паведамлялася прычына пераследу і ўтрымання пад вартай. Паводле публікацыі дзяржаўнай газеты «Беларусь сегодня», прычынай крымінальнай справы, распачатай супраць Ігара Карнея, стала яго супрацоўніцтва з грамадскай арганізацыяй «Беларуская асацыяцыя журналістаў». Праваабарончая журналісцкая арганізацыя ў 2021 годзе была пазбаўленая юрыдычнага статусу Вярхоўным судом на патрабаванне Мінюста, на пачатку 2023 года абвешчаная рашэннем КДБ «экстрэмісцкім фарміраваннем».  

     Па версіі боку абвінавачання, Ігар Карней нібыта па матывах ідэалагічнай і палітычнай варожасці працягваў супрацоўнічаць з «экстрэмісцкай арганізацыяй» БАЖ, ствараючы для яе інфармацыйных рэсурсаў «негатыўныя матэрыялы з абразамі кіраўніка дзяржавы, прадстаўнікоў улады, журналістаў і грамадзян, якія не падтрымліваюць неканстытуцыйную змену ўлады». І ў сваіх артыкулах ён нібыта «даваў ілжывую карціну пра эканамічнае, сацыяльнае, ваеннае і міжнароднае становішча Рэспублікі Беларусь».

    Журналіста-фрылансера затрымалі пасля ператрусу ў ягонай кватэры 17 ліпеня 2023 года — як было абвешчана сваякам, на 10 сутак. Падчас ператрусу сілавікі забралі камп’ютар і іншыя лічбавыя носьбіты інфармацыі. Некалькі дзён Карней знаходзіўся ў ізалятары часовага ўтрымання на Акрэсціна, потым яго перавялі ў следчы ізалятар № 1 у Мінску, там яго трымаюць пад вартай дагэтуль.

    Незадоўга да зняволення, 9 траўня 2023 года, Ігара Карнея на некалькі гадзін затрымлівалі на літоўска-беларускім памежжы, калі ён вяртаўся з вандроўкі. Журналіст і раней праходзіў працэдуры пільнага дагляду на мяжы, але гэтым разам на памежным пераходзе «Каменны Лог» трапіў на сапраўдны допыт.

    Ігар Карней у судзе. 19 сакавіка 2024 года. Скрыншот відэа СТВ

    Двое супрацоўнікаў КДБ — прыналежнасць да гэтага ведамства была пазначана ў прад’яўленых Карнею дакументах — праглядалі ягоны тэлефон і ўважліва распытвалі пра журналісцкую дзейнасць. «Крамолай», знойдзенай у тэлефоне, ім падавалася і аўтавыдаленне ліставання, і наяўнасць замежных тэлефонных нумароў, і англамоўныя допісы. Усё гэта інтэрпрэтавалася як наўмыснае прыхоўванне нейкіх важных звестак. Тым не менш, тэлефон урэшце вярнулі ўладальніку, і Карней паехаў дадому. 

    На той час ён сур’ёзна займаўся краязнаўствам і блогерствам, пісаў артыкулы для краязнаўчага сайта «Крэва.Трэвел». Увогуле яго журналісцкая біяграфія вельмі багатая: яшчэ студэнтам журфака БДУ ён стаў адным з заснавальнікаў моладзевай аршанскай  незалежнай газеты «Лидер». Пазней друкаваўся ў газетах «Знамя юности», «Чырвоная змена», «Комсомольская правда», з 1991 года працаваў у газеце «Звязда». У 1994–2000 гадах быў карэспандэнтам незалежнага штотыднёвіка «Свободные новости». У 2000 годзе прыйшоў на «Радыё Свабода», але сышоў адтуль, калі рэдакцыя рэлакавалася ў замежжа.

    Вядома, што 15 лістапада 2020 года Ігара Карнея затрымлівалі падчас аднаго з мірных маршаў у Мінску. Тады яго пакаралі 10 суткамі адміністрацыйнага арышту, якія ён адбываў у ізалятары часовага ўтрымання ў Жодзіна.

    1 студзеня 2024 года Ігару Карнею споўнілася 56 гадоў. Гэтую дату ён сустрэў ужо за кратамі.

    Самыя важныя навіны і матэрыялы ў нашым Тэлеграм-канале — падпісвайцеся!
    @bajmedia
    Найбольш чытанае
    Акцэнты

    30-годдзе за кратамі — сёння ў зняволенай журналісткі Кацярыны Андрэевай дзень народзінаў

    Кацярына Андрэева мусіла сустрэць «круглую» дату на волі — 5 верасня 2022 года сканчаўся яе несправядлівы тэрмін у калоніі. Але не. 7 красавіка 2022-га сям’і палітзняволенай журналісткі стала вядома, што ёй выставілі новае абвінавачанне. 13 ліпеня 2022 года Кацярыну прызналі вінаватай «у выдачы замежнай дзяржаве, міжнароднай альбо замежнай арганізацыі ці іх прадстаўніку дзяржаўных сакрэтаў Рэспублікі Беларусь». Суддзя Гомельскага абласнога суда Алег Харошка прызначыў ёй яшчэ 8 год пазбаўлення волі.
    02.11.2023
    Акцэнты

    Карцер, ПКТ, ШИЗО — что это такое? Как наказывают политзаключенных, которые уже находятся за решеткой

    28.06.2023
    Акцэнты

    Чацвёра з дзесяці сышлі з прафесіі. Як абышоўся «Талібан» з журналістыкай у Афганістане

    Далёкі Афганістан і Беларусь яднае не так ужо мала, як падаецца на першы погляд. Калі глядзець на медыясферу, дык атрымліваецца амаль што калька: незалежныя журналісты працягваюць працу ў выгнанні, некаторых кінулі ў турму, у індэксе свабоды прэсы абедзве краіны — у чырвонай зоне. Фотарэпарцёрка Фаціма Хасайні, калі завітала ў Вільню, падзялілася ўласным поглядам на сітуацыю.
    01.03.2024
    Кожны чацвер мы дасылаем на электронную пошту магчымасці (гранты, вакансіі, конкурсы, стыпендыі), анонсы мерапрыемстваў (лекцыі, дыскусіі, прэзентацыі), а таксама самыя важныя навіны і тэндэнцыі ў свеце медыя.
    Падпісваючыся на рассылку, вы згаджаецеся з Палітыкай канфідэнцыйнасці