Камітэт па абароне журналістаў асудзіў прысуд Ігару Карнею

Камітэт па абароне журналістаў (CPJ) асудзіў рашэнне беларускага суда ў дачыненні да незалежнага журналіста Ігара Карнея. Яго абвінавацілі ва ўдзеле ў экстрэмісцкім фармаванні і прыгаварылі да трох гадоў пазбаўлення волі і штрафу ў памеры 20 000 беларускіх рублёў (6 115 долараў ЗША).

Ігар Карней у судзе. 19 сакавіка 2024 года. Скрыншот відэа СТВ

«Уладам Беларусі хапіла трох дзён, каб адправіць Ігара Карнея ў турму на тры гады: тыповы прыклад хуткасці і самавольства ў прысудах у дачыненні да незалежных журналістаў у краіне, — заявіла каардынатарка праграмы CPJ па Еўропе і Цэнтральнай Азіі Гульноза Саід. — Беларускія ўлады павінны неадкладна зняць усе абвінавачванні з Карнея і вызваліць яго разам з усімі іншымі зняволенымі журналістамі».

Суд над Ігарам Карнеем распачаўся ў аўторак, 19 сакавіка 2024 года, у Менску, а ў пятніцу, 22 сакавіка, яго прызналі вінаватым. Дзяржаўная газета «Беларусь сегодня» заявіла, што Карней супрацоўнічаў з Беларускай асацыяцыяй журналістаў. У абвінаваўчым заключэнні гаворыцца, што Карней пісаў «негатыўныя матэрыялы, якія абражаюць кіраўніка дзяржавы» і іншых, а таксама даваў «ілжывае ўяўленне» аб Беларусі.

Журналіста-фрылансера затрымалі пасля ператрусу ў ягонай кватэры 17 ліпеня 2023 года — як было абвешчана сваякам, на 10 сутак. Падчас ператрусу сілавікі забралі камп’ютар і іншыя лічбавыя носьбіты інфармацыі. Некалькі дзён Карней знаходзіўся ў ізалятары часовага ўтрымання на Акрэсціна, потым яго перавялі ў следчы ізалятар № 1 у Мінску.