Сайт «Рэпарцёраў без межаў» заблакавалі ў Расіі

Раскамнагляд заблакаваў доступ да сайта міжнароднай няўрадавай арганізацыі «Рэпарцёры без межаў». Прычынай называюць распаўсюд фэйкаў пра вайну Расіі ва Украіне.

Фота: Bertrand Guay, AFP / крыніца: rfi.fr

Увагу на блакаванне сайту «Рэпарцёраў без межаў» звярнуў праект «Роскомсвобода». Паводле яго, доступ абмежаваны адразу да ўсіх даменаў і паддаменаў. Рашэнне аб блакіроўцы вынес «непазначаны дзяржорган». Выданне мяркуе, што гэта з вялікай доляй верагоднасці Генпракуратура Расіі — у яе паўнамоцтвы ўваходзяць ваенная цэнзура, блакіроўка экстрэмісцкіх і тэрарыстычных матэрыялаў, сайтаў «непажаданых» арганізацый, заклікаў да масавых беспарадкаў і г.д.

Прычынай блакіроўкі сайта «Рэпарцёраў без межаў» стала публікацыя «недакладнай грамадска значнай інфармацыі аб спецыяльнай ваеннай аперацыі», паведамляе «Інтэрфакс» са спасылкай на прэс-службу Раскамнагляду:

«Раскамнагляд абмежаваў доступ да гэтага рэсурсу ў адпаведнасці з артыкулам 15/03 федэральнага закона «Аб інфармацыі, інфармацыйных тэхналогіях і абароне інфармацыі». На сайце было выяўлена распаўсюджванне фейкаў аб спецыяльнай ваеннай аперацыі».

Міжнародная няўрадавая арганізацыя «Рэпарцёры без межаў» была заснаваная ў 1985 годзе ў Манпелье, цэнтральны офіс размяшчаецца ў Парыжы. Мэта арганізацыі — абарона права на свабоду інфармацыі. Яна мае кансультатыўны статус у ААН, ЮНЕСКА і Савеце Еўропы. «Рэпарцёры без межаў» з 2002 году штогод публікуюць на сваім сайце Сусветны індэкс свабоды прэсы.