Памер беларускі драматург Аляксей Дудараў

27 лютага 2023 года беларускі драматург, заслужаны дзеяч мастацтваў Аляксей Дудараў. Пра гэта паведаміў Беларускі саюз тэатральных дзеячаў.  Аляксею Дудараву было 72 гады.

Будучы драматург нарадзіўся ў вёсцы Кляны Дубровенскага раёна Віцебскай вобласці. Спачатку атрымаў адукацыю  ў Наваполацкім прафесійна-тэхнічным вучылішчы нафтавікоў, пасля якога працаваў слесарам на нафтаперапрацоўчым заводзе.

Аднак у 1970‑х Дудараў вырашае кардынальна змяніць сваё жыццё: паступае на тэатральны факультэт у Беларускі тэатральна-мастацкі інстытут, атрымлівае спецыяльнасць «акцёр драмы і кіно» і ідзе працаваць акцёрам (а пасля — загадчыкам літаратурнай часткі) у ТЮГ. 

Аляксей Дудараў быў членам сцэнарна-рэдакцыйнай калегіі «Тэлефільм», займаў пасаду галоўнага рэдактара часопіса «Мастацтва», 10 гадоў быў мастацкім кіраўніком Драматычнага тэатра Беларускай арміі. Да апошніх дзен з’яўляўся старшынёй Беларускага саюза тэатральных дзеячаў. 

Ён напісаў шматлікія казкі, апавяданні і п’есы. Спектаклі па яго творах ішлі практычна ва ўсіх тэатрах Беларусі.

«Сучасная драматургія неймаверная без яго імя. Спектаклі, пастаўленыя паводле яго п’ес, — упрыгожванне рэпертуару многіх драматычных тэатраў Беларусі. Гледачы ніколі не маглі застацца абыякавымі да яго «простых гісторый», бо ў цэнтры кожнай быў чалавек — жывы, сапраўдны, думаючы, — наш сучаснік, які аказваўся перад выбарам, што ставілі перад ім Час і Лёс. Як часта можна было бачыць людзей, якія сыходзяць пасля спектакля паводле твораў Дударава са слязамі на вачах, — ці не гэта вышэйшая ацэнка яго таленту», — зазначылі ў беларускім Вялікім тэатры оперы і балета, дзе ідзе балет «Вітаўт», у аснову якога была пакладзена п’еса слыннага драматурга.

Дудураў таксама быў аўтарам сцэнарыяў да 16 фільмаў, сярод якіх — культавы «Белыя Росы».

Чытайце яшчэ:

БАЖ праводзіць апытанне аўдыторыі: прайдзіце яго і дапамажыце нам стаць лепш!

Набыў моц прысуд журналісту Дзмітрыю Лукшу

Youtube і Google раяць беларусам глядзець дзяржТБ і расійскую прапаганду. Чаму так?