«Одноклассники» ў апале: улады прызналі «экстрэмісцкімі» сеткавыя групы медыярэсурсаў і апазіцыйных палітыкаў

Усе забароненыя для распаўсюду матэрыялы трапляюць у сістэматызаваны пералік на сайце Мінінфарма. Спіс ледзь не штодзённа пашыраецца, гэтым разам акцэнт зроблены на платформы ў расійскай сацыяльнай сетцы «Одноклассники».

У прыватнасці, па-за законам абвешчаны шэраг медыйных пляцовак:

–  Група ў сацсетцы з назвай «Радыё Свабода» (ідэнтыфікатар https://ok.ru/radiosvaboda). Адпаведнае рашэнне прыняў суд Барысаўскага раёна Мінскай вобласці ад 17 траўня.

– Група ў сацсетцы з назвай «Новы Час» (ідэнтыфікатар  https://ok.ru/novychas). Паводле рашэння суда Барысаўскага раёна  Мінскай вобласці ад 17 траўня.

– YouTube-канал блогеркі Таццяны Мартынавай (электронны адрас https://www.youtube.com/@tvmartynova). На падставе рашэння суда Цэнтральнага раёна Мінска ад 19 траўня.

Ва ўсіх выпадках прыкладаецца адсылка да арт. 314 Грамадзянскага працэсуальнага кодэксу і неабходнасці «неадкладнага выканання» судовых выракаў.

Акрамя таго, да экстрэмісцкіх матэрыялаў у тых жа «Одноклассниках»  залічана інфармацыйная прадукцыя двух удзельнікаў перадвыбарчай кампаніі 2020 года. Гэта групы з назвамі «Виктор Бабарико» (ідэнтыфікатар https://ok.ru/viktar.babaryka.official) і «Светлана Тихановская» (ідэнтыфікатар https://ok.ru/tsikhanouskaya). Рашэннямі ўсё таго ж Барысаўскага раёна, прынятымі 17 траўня. 

Сярод іншага «Рэспубліканскі спіс экстрэмісцкіх матэрыялаў»  Міністэрства інфармацыі папоўнілі і іншыя «нядобранадзейныя» рэсурсы:

– Старонка ў Insta­gram пад назвай «Цэнтр Беларускай Салідарнасці»,

– Мэтавыя суполкі ў «Одноклассниках» пад назвамі «Беларускі нацыянальны кангрэс», «Беларусь политическая», «Жыве Беларусь», «Уходи, Лукашенко»;

– Telegram-чаты і каналы: «Дзённік экстрэміста», «Розочка», «Чат канала Инсайдер», «Боевая Организация Анархо-Коммунистов».

Паводле падліку праваабаронцаў і журналістаў, колькасць судовых рашэнняў аб прызнанні «экстрэмісцкімі» кантэнтаў СМІ, кніг, фільмаў,  музычных твораў, каналаў ды чатаў ужо перавысіла 1600 пазіцый. Прычым абсалютную большасць улады зацэнзуравалі пасля пратэснага 2020 года, з пачаткам шырокага наступу на грамадзянскую супольнасць. 

Аспрэчыць занясенне ў «чорны спіс» ва ўмовах сённяшняга прававога бязмежжа практычна нерэальна. 

Чытайце яшчэ:

Міжнародныя арганізацыі: «Грамадзянская супольнасць пацвярджае нязменную салідарнасць з палітвязнямі!»

Журналисты могут быть «законной военной целью»? БАЖ разбирается в правовых нюансах с юристом-международником

Больш за 100 нобелеўскіх лаўрэатаў далучыліся да Міжнароднага ПЭНа ў падтрымцы лаўрэата Нобелеўскай прэміі міру Алеся Бяляцкага