КДБ папоўніў свой “тэрарыстычны спіс” палітзняволеным журналістам Андрэем Пачобутам

4 кастрычніка Камітэт дзяржбяспекі дадаў журналіста ў спіс асобаў, датычных да тэрарыстычнай дзейнасці. 

Вядомы журналіст ужо паўтара года знаходзіцца за кратамі, не так даўно яго этапавалі са следчай турмы №8 Жодзіна ў следчы ізалятар роднага Гродна. Як мяркуюць праваабаронцы, гэта азначае, што неўзабаве яго пачнуць судзіць.  

На гэты момант Андрэй Пачобут праходзіць фігурантам двух крымінальных спраў — “заклікі да дзеянняў, скіраваных на прычыненне шкоды нацыянальнай бяспецы Рэспублікі Беларусь” (арт. 361 КК) і  “распальванне варожасці ці варажнечы” (арт. 130 КК). 

Але няма гарантыі, што ў дадатак не нагрузяць і дадатковыя “злачынствы”. Прынамсі, той факт, што ягонае прозвішча аказалася ў спісе датычных да “тэрарыстычнай дзейнасці”, у сваякоў і паплечнікаў выклікае трывогу. 

Нельга выключаць, што такім чынам рэжым помсціць вязню за “незгаворлівасць” – арыштаваным па так званай “справе палякаў” прапаноўвалася вызваленне наўзамен на пакаянне, аднак Андрэй Пачобут ад “здзелкі” катэгарычна адмовіўся.    

Сваякі Андрэя Пачобута непакояцца, што за прамінулы час ён моцна схуднеў, бо мае сур’ёзныя праблемы са страўнікам і практычна нічога не есць.  

Журналіста затрымалі 25 сакавіка 2021 года ў Гродне, дома ўчынілі ператрус. Пасля гэтага перавезлі ў цэнтральны апарат Следчага камітэта ў Мінск, дзе адбыўся допыт. У выніку пакінулі пад вартай у СІЗА №1 у статусе падазраванага паводле ч. 3 арт. 130 Крымінальнага кодэкса (здзяйсненне групай асоб наўмысных дзеянняў, накіраваных на распальванне нацыянальнай, рэлігійнай варожасці і варажнечы па прыкмеце нацыянальнай, рэлігійнай, моўнай прыналежнасці, здзяйснення наўмысных дзеянняў па рэабілітацыі нацызму). 

У абвінавачанні сцвярджаецца, што Андрэй Пачобут у медыях назваў “агрэсіяй” напад СССР на Польшчу ў 1939 годзе. Акрамя таго, яму інкрымінавалі заявы ў абарону польскай меншасці ў Беларусі, артыкулы ў польскім выданні Gaze­ta Wybor­cza пра беларускія пратэсты ў 2020 годзе і тэкст у Mag­a­zyn Pol­s­ki, прысвечаны аднаму з камандзіраў польскага антыкамуністычнага падполля на Гродзеншчыне Анатолю Радзівоніку. 

Неўзабаве пасля затрымання ўлады пачалі аказваць ціск на палітзняволенага журналіста, каб той напісаў прашэнне аб памілаванні на імя Лукашэнкі – маўляў, бальшыня “падзельнікаў па польскай справе” гэта ўжо зрабілі і цяпер у Польшчы ці пад хатнім арыштам. Але той адказаў адмовай.  

У сярэдзіне жніўня Андрэй Пачобут пачаў знаёміцца са справай, чакаецца, што хутка яе перададуць у суд. Праваабаронцам стала вядома, што ўжо за кратамі яму выставілі абвінавачанне паводле артыкула 361 Крымінальнага кодэкса (“заклікі да мер абмежавальнага характару (санкцый), накіраваных на прычыненне шкоды нацыянальнай бяспецы”).

У сваю чаргу ўлады Польшчы запэўніваюць: афіцыйная Варшава ніколі не змірыцца з тым, што ў Беларусі з прадстаўнікамі польскай меншасці абыходзяцца як з “закладнікамі”.

Чытайце яшчэ:

Дмитрий Навоша: «Трибуна» будет переходить на беларусский язык

В суд направлено уголовное дело по обвинению экс-журналиста Дмитрия Лукши

Спявачка Paulinn: Не ведаю, як павернецца жыццё, таму трэба быць «універсальным салдатам»