Супраць Таццяны Пыцько распачатая крымінальная справа за дапамогу мужу — відэааператару Вячаславу Лазараву

Таццяну Пыцько затрымалі 6 чэрвеня. Праз некалькі дзён ёй прад’явілі абвінавачанне паводле арт. 361–1 Крымінальнага кодэкса РБ (стварэнне экстрэмісцкага фармавання або ўдзел у ім).

Сутнасць справы стала вядомая пасля таго, як у Следчы камітэт пачалі выклікаць людзей па справе Таццяны. Следчых цікавіла, каго здымаў Вячаслаў Лазараў, хто быў ініцыятарам здымак і замоўнікам відэаматэрыялаў. У СК трапіў архіў відэааператара, што захоўваўся на ягоных камп’ютарах і ў тэлефоне. Там знайшліся відэаздымкі, падчас якіх прысутнічала і Таццяна Пыцько. На думку следства, такім чынам яна ўзяла ўдзел у дзейнасці экстрэмісцкага фармавання.

Супраць яе мужа, Вячаслава Лазарава, распачатая крымінальная справа паводле арт. 361–4 КК РБ (спрыянне экстрэмісцкай дзейнасці) за сувязь з недзяржаўным СМІ, прызнаным у Беларусі экстрэмісцкім фармаваннем.

Відэааператар-фрылансер Вячаслаў Лазараў быў затрыманы сёлета 9 лютага. У яго кватэры сілавікі правялі ператрус, у выніку якога да следчых трапіла аргтэхніка. З тае пары яго ўтрымліваюць пад вартай.

Праваабаронцы выказваюць меркаванне, што пераслед ягонай жонкі з’яўляецца дадатковым фактарам ціску на зняволенага.

28 сакавіка праваабарончая супольнасць прызнала віцебскага відэааператара-фрылансера палітычным вязнем. Сёння, 21 чэрвеня, такі самы статус быў нададзены і Таццяне Пыцько.

Чытайце яшчэ: 

Затрымалі Таццяну Пыцько, жонку палітзняволенага віцебскага відэааператара Вячаслава Лазарава

Яўген Магда: «Распавядаць пра Беларусь ва Украіне — як кідаць зерне на бетонную падлогу»

Журналіста Анджэя Пачобута этапавалі ў наваполацкую калонію