Журналіста Анджэя Пачобута этапавалі ў наваполацкую калонію
21 чэрвеня 2023
Да нядаўняга часу вядомы журналіст і адзін з лідараў незалежнага Саюза палякаў Беларусі Анджэй Пачобут утрымліваўся ў СІЗА гродзенскай турмы. 26 траўня Вярхоўны суд у закрытым рэжыме разгледзеў апеляцыйную скаргу на вынесены яму прысуд. Суддзя Ігар Любавіцкі пакінуў прысуд без зменаў — 8 гадоў калоніі ўзмоцненага рэжыму. Цяпер журналіста этапавалі ў папраўчую калонію № 1 у Наваполацк.
Менавіта там ён будзе адбываць прысуджаны тэрмін.
Наваполацкая калонія мае благую славу і лічыцца адной з самых «чырвоных» зон Беларусі. Гэта значыць, у адносінах паміж зняволенымі і адміністрацыяй усё надзвычай зарэгламентавана нормамі і распарадкам. Як кажуць былыя сядзельцы, там «кіруюць мянты па беспрадзеле», абыходжанне з асуджанымі вельмі жорсткае. Менавіта тут адбывае свой 14-гадовы тэрмін былы прэтэндэнт у кандыдаты на пост прэзідэнта і банкір Віктар Бабарыка, сядзяць журналісты Ігар Лосік і Андрэй Кузнечык.
Палітзняволенага журналіста Анджэя Пачобута затрымалі 25 сакавіка 2021 года ў Гродне паводле так званай «польскай справы». За публікацыю пра падзеі верасня 1939-га ХХ стагоддзя Анджэя абвінавацілі ў «распальванні варожасці па нацыянальнай прыкмеце» — у прыватнасці, інкрымінавалася, што ён назваў агрэсіяй напад СССР на Польшчу. Таксама ў матэрыялах крымінальнай справы фігуравалі заявы журналіста ў абарону польскай меншасці ў Беларусі, артыкул пра падаўленне беларускіх пратэстаў у 2020‑м і тэкст 2006 года пра аднаго з камандзіраў польскага антыкамуністычнага падполля на Гродзеншчыне.
Працэс у абласным судзе Гродна пачаўся толькі сёлета 16 студзеня і праходзіў у закрытым рэжыме. 8 лютага суддзя Дзмітрый Бубенчык вынес прысуд журналісту — 8 гадоў пазбаўлення волі з адбываннем у калоніі ўзмоцненага рэжыму.
У кастрычніку 2022 года Камітэт дзяржбяспекі ўнёс Анджэя Пачобута ў спіс асоб, датычных да «тэрарыстычнай дзейнасці».
Увесь час знаходжання пад вартай журналісту забароненыя спатканні са сваякамі, ягоныя лісты цэнзуруюцца і блакуюцца ў перапісцы нават з сынам. Цягам больш чым двух гадоў за кратамі Анджэй Пачобут адчуваў пастаянны ціск. Тым не менш, ён неаднаразова адхіляў прапановы вызвалення ў абмен на просьбу аб памілаванні і ад’езд з Беларусі.
Чытайце яшчэ:
Яўген Магда: «Распавядаць пра Беларусь ва Украіне — як кідаць зерне на бетонную падлогу»
«Жартуе, што «працуе бамжом» — перабірае смецце». Што новага ў журналіста-палітвязня Сяргея Сацука
«Айфоны калег ускрылі спецыяльнай прыблудай на раз-два». Аповед журналістаў, чыю рэдакцыю знішчылі два месяцы таму
@bajmedia
Журналістаў-расследавальнікаў з «Бюро Медыя» абвясцілі ў міждзяржаўны вышук
26.07.2024
Дзянісу Івашыну ў турме не аддалі бандэроль з кнігамі
01.05.2024
Праўладнага блогера Катлярова прызналі палітвязнем, бо яго пераследуюць за негвалтоўную рэалізацыю свабоды думкі — праваабаронцы
21.11.2024
Пракурор Магілёўскай вобласці пастанавіў заблакаваць доступ да сайта ініцыятывы INeedHelpBY
14.06.2024
