Разгляд апеляцыі медыяменеджара Канстанціна Залатых прызначаны на 4 ліпеня
20 чэрвеня 2023
Як стала вядома Беларускай асацыяцыі журналістаў, 4 ліпеня Вярхоўны суд будзе разглядаць апеляцыйную скаргу дырэктара эканамічнага выдання «Белорусы и рынок» Канстанціна Залатых. Судом першай інстанцыі ён пакараны 4 гадамі зняволення па шэрагу дыфамацыйных артыкулаў.
Анонса пасяджэння на сайце Вярхоўнага суда пакуль няма, таму дакладна невядома, хто з суддзяў прызначаны разглядаць заяву.
Палітвязеня ужо больш за год утрымліваюць у следчым ізалятары Мінска. Яго разам з рэдакцыйнымі калегамі затрымалі 18 траўня 2022 года супрацоўнікі КДБ. Пасля допыту галоўнага рэдактара Андрэя Александровіча і бухгалтарку Юлію Кахно адпусцілі, а Канстанціна Залатых пакінулі пад вартай.
Пазней стала вядома, што яму прад’явілі чатыры артыкулы Крымінальнага кодэкса. Перадусім фігуранту ставілі ў віну дыфамацыйныя пункты, якія звыкла фігуруюць у справах за іншадумства.
– арт. 130 ч. 2 — распальванне расавай, нацыянальнай, рэлігійнай або іншай сацыяльнай варожасці;
– арт. 368 ч. 1 — абраза прэзідэнта Рэспублікі Беларусь;
– арт. 369 — абраза прадстаўніка ўлады;
– арт. 426 ч. 2 — перавышэнне ўлады ці службовых паўнамоцтваў.
Праваабарончая супольнасць прызнала Канстанціна Залатых палітычным вязнем і запатрабавала спыніць нічым не матываваны пераслед.
Толькі сёлета 24 сакавіка Мінскі гарадскі суд прыступіў да разгляду справы медыяменеджара. Суддзя Алена Шылько адразу зрабіла працэс закрытым.
У працэсе агучвання аргументаў, атрыманых ад следства, бок пракуратуры прыйшоў да высновы: дырэктар газеты «Белорусы и рынок» актыўна выказваў «уласную тэндэнцыйную пазіцыю» на падзеі ў краіне, што, сярод іншага, выявілася ў абразлівых каментарах на адрас вышэйшых асобаў дзяржавы, пакінутых у сацыяльных сетках. Акрамя таго, ён нібыта «мэтанакіравана карыстаўся службовым становішчам» для вырашэння персанальных патрэбаў.
На гэтай падставе абвінавачанага пакаралі 4 гадамі калоніі агульнага рэжыму.
Адметна, што затрымлівалі медыяменеджара толькі за «распальванне варожасці», астатнія эпізоды канстатавалі як факт ужо падчас яго знаходжання ў следчым ізалятары.
Канстанцін Залатых — медыйны менеджар і вытворчы адміністратар, супрацоўнічаў з вядучымі незалежнымі СМІ і буйнымі дзяржаўнымі прадпрыемствамі, неаднаразова быў у складзе дэлегацый, якія прасоўвалі беларускую прадукцыю на знешні рынак.
Апошнім месцам працы была газета «Белорусы и рынок» — адно з рэдкіх незалежных выданняў, якое здолела захавацца пасля хвалі масавых рэпрэсій супраць недзяржаўных рэдакцый.
Летась 23 ліпеня, ужо пасля затрымання Канстанціна Залатых, доступ да сайта газеты belmarket.by ў Беларусі быў заблакаваны Міністэрствам інфармацыі «з прычыны распаўсюду гіперспасылак на матэрыялы, прызнаныя судом экстрэмісцкімі».
Аднак у канцы года ведамства скасавала ранейшае рашэнне і выдала распараджэнне аб аднаўленні доступу да інтэрнэт-старонкі выдання.
Чытайце яшчэ:
«Экстрэмісцкім» аб’яўлены асобны артыкул на сайце БАЖ пра звольненых супрацоўнікаў дзяржТБ
«Мы цалкам салідарныя з нашымі адважнымі калегамі!» МФЖ падхапіў эстафету падтрымкі палітзняволеных журналістаў
Хто стварае дзікія вокладкі «Мінскай праўды»?
@bajmedia
