Кітай уводзіць цэнзуру «надзвычайнага ўзроўню» ў сувязі з пратэстамі
Кітайскія ўлады будуць адсочваць прыватныя сацсеткі сваіх грамадзян, дзе гаварылася пра пратэсты, і доступ да забароненых СМІ.
У СМІ прасачыліся дырэктыва кітайскіх уладаў, згодна з якой у КНР уводзіцца самы высокі ўзровень цэнзуры «экстранага рэагавання», якая прадугледжвае падаўленне VPN і іншых метадаў абыходу анлайн-цэнзуры. Падставай для такіх жорсткіх мер з боку ўлады сталі беспрэцэдэнтныя пратэсты, якія прадэманстравалі шырока распаўсюджаную грамадскую незадаволенасць палітыкай «нулявога ўзроўню» COVID-19, піша «The Guardian».
Рэпрэсіі, уключаючы адсочванне і допыты пратэстоўцаў, суправаджаюцца паслабленнем пандэмічных абмежаванняў. Апошні тыдзень у Кітаі адзначыўся пратэстамі, якіх ужо дзесяцігоддзі не было ў краіне: людзі выйшлі на вуліцы супраць абмежаванняў, звязаных з нулявым узроўнем Covid, але хутка сталі ўключаць у свае патрабаванні крытыку аўтарытарнага праўлення Сі Цзіньпіна, якая была яшчэ больш падкрэслена смерцю былога кітайскага лідара Цзян Цзэміня.
Паводле дырэктывы, выдадзенай кітайскім анлайн-платформам, кітайскія ўлады асабліва заклапочаныя абыходам грамадзянамі краіны так званага «Вялікага брандмаўэра» Кітая. Дэманстрацыі на вуліцах кітайскіх гарадоў падвяргаліся строгай цэнзуры, але пратэстоўцы і іншыя грамадзяне выкарыстоўвалі VPN для доступу да некітайскіх навін і прыкладанняў для сацыяльных сетак, якія забароненыя ў КНР.
Гэтая дырэктыва загадвае кіраўнікам анлайн-платформ выкарыстоўваць «практычны падыход» і «ўзмацніць кіраванне кантэнтам, каб хутка выяўляць, апрацоўваць і паведамляць інфармацыю пра парушэнні ў аўтаномным рэжыме» і «нядаўнія гучныя падзеі ў розных правінцыях».
«Інцыдэнт 24 лістапада выклікаў выражэнне розных нездаволенасцей, — гаворыцца ў дакуменце (верагодна, маецца на ўвазе пажар ва Урумчы). — У Шанхаі з’явіліся згубныя палітычныя лозунгі; студэнты каледжаў і ўніверсітэтаў праводзілі палітычныя сходы; узмоцніўся паклёп з боку замежных СМІ; і розныя вэб-сайты ўзмацнілі кіраванне сваім кантэнтам».
Нагадаем, у канцы лістапада ў Кітаі ўспыхнулі пратэсты пасля пажару на захадзе краіны, які выклікаў усеагульны гнеў: праз жорсткія абмежаванні па COVID-19 людзі не змаглі выбрацца з‑пад агню, 10 чалавек загінулі. Дэманстранты, якія выйшлі на вуліцы Пекіна, Шанхая і Урумчы, крычалі і трымалі ў руках чыстыя аркушы паперы. Даволі хутка антыкавідныя патрабаванні перараслі ў палітычныя, і людзі на вуліцах сталі выходзіць з лозунгамі «Далоў Камуністычную партыю Кітая, далоў Сі Цзіньпіна!».
Чытайце яшчэ:
«Я быў супраць, тым не менш рабіў недастаткова…» Вялікая гутарка з рэдактарам расійскага незалежнага выдання Republic
Гена Кеснер — геній гісторый. 12 эпізодаў з жыцця крутога журналіста
У Латвіі анулявалі ліцэнзію расійскага тэлеканала «Дождж», які днямі трапіў у скандал
![](https://khdbz39sm.shop/wp-content/themes/baj/assets/images/telegram-logo.jpg)