«Бачыў, што хмары згушчаюцца». Блогер Сяргей Пятрухін расказаў пра ад’езд з Беларусі
13 лютага 2024
Брэсцкі блогер і былы палітвязень Сяргей Пятрухін выехаў з Беларусі з дапамогай BYSOL. Ён прыняў удзел у стрыме свайго сябра і калегі Аляксандра Кабанава, дзе расказаў пра прычыны ад’езду.
Пра паспяховую эвакуацыю Сяргея Пятрухіна з Беларусі паведаміў у сваім тэлеграм-канале сузаснавальнік фонду салідарнасці BYSOL праваабаронца Андрэй Стрыжак 13 лютага 2024 года.
«Гэтая эвакуацыя была складанай, доўгай і напружанай, але я шчаслівы паведаміць, што ўсё атрымалася!» — напісаў Стрыжак.
У той жа вечар Пятрухін з’явіўся ў стрыме на ютуб-канале «Народны рэпарцёр».
«Трэба прыйсці ў сябе і сказаць вялікі дзякуй тым, хто дапамог мне выйсці з гэтай краіны, якую я вельмі люблю. То бок я маю на ўвазе дзяржаву. Вельмі трыгернула мяне, калі «Е‑дастаўка» гэтая здарылася. Я падумаў, што лепей мне з’ехаць, бо ў спакоі мяне не пакінуць», — сказаў блогер падчас стрыма.
Сяргей Пятрухін, як і Аляксандр Кабанаў, ужо адбыў тэрмін па палітычнай справе. Пасля вызвалення ён яшчэ год заставаўся ў Беларусі.
«Аднак я бачыў, што хмары згушчаюцца, і праз страх зноў быць арыштаваным і атрымаць тэрмін я вырашыў з’язджаць. Таму 10 лютага 2024 года я з дапамогай каманды эвакуацыі BYSOL з’ехаў з краіны», — патлумачыў Пятрухін.
Зараз BYSOL абвясціў збор для блогера. Яму трэба зняць кватэру, аплаціць базавыя патрэбы і набыць просты ноўтбук для працы.
Аўтары ютуб-канала «Народны рэпарцёр» жыхары Брэста Сяргей Пятрухін і Аляксандр Кабанаў былі затрыманыя ў чэрвені 2020 года. Іх справы звязалі з падзеямі 29 траўня ў Гродна, калі арыштавалі Сяргея Ціханоўскага.
14 красавіка 2021 года суд Кастрычніцкага раёна Магілёва прызнаў блогераў вінаватымі паводле артыкулу 342 (арганізацыя і падрыхтоўка дзеянняў, якія груба парушаюць грамадскі парадак, альбо актыўны ўдзел у іх) і артыкулу 369 (абраза прадстаўніка ўлады) Крымінальнага кодэкса. Пятрухіна дадаткова прызналі вінаватым паводле артыкула 391 (абраза суддзі). Іх прыгаварылі да 3 гадоў калоніі агульнага рэжыму.
Блогеры выйшлі на волю 17 снежня 2022 года. Кабанаў амаль адразу пакінуў Беларусь, цяпер ён працуе ў аб’яднанні былых сілавікоў BelPol.
Чытайце яшчэ:
Белорусские блогеры, зарабатывающие на рекламе, не могут быть самозанятыми — адвокат
Сярод абвінавачаных за «здраду дзяржаве» — шасцёра журналістаў і блогераў. Хто яны?
@bajmedia
PALATNO.media прызналі экстрэмісцкім
09.10.2023
Журналіст Яўген Меркіс шые ў калоніі абутак і чакае харчовую перадачу
14.11.2023
У СНД раптам задумаліся пра забеспячэнне правоў журналістаў. Па ініцыятыве Расіі
21.03.2024
Экстрэмісцкай інфармацыйнай прадукцыяй прызналі кантэнт рэгіянальных выданняў «Магілёў.Media» і «Першы Пінскі»
05.01.2024
