1 студзеня дзень народзінаў адзначае за кратамі журналіст Ігар Карней. Яму спаўнілася 56 гадоў

Ігар Карней у журналістыцы — з 1990 года. У студэнцкія гады і на пачатку прафесійнай кар’еры друкаваўся ў газетах «Знамя юности», «Чырвоная змена», «Комсомольская правда», «Звязда». У 1994–2000 гадах працаваў у тыднёвіку «Свободные новости», адным з самых тыражных тагачасных грамадска-палітычных выданняў, і быў без перабольшання самым яскравым журналістам газеты.

У 2000 годзе прыйшоў на «Радыё Свабода». У апошнія гады працаваў як журналіст-фрылансер. Увогуле сфера ягоных інтарэсаў і фарматаў працы дазваляюць вызначаць яго яшчэ як эсэіста, аўтара тэкстаў пра культурна-гістарычную спадчыну Беларусі, трэвэл-блогера.

Праваабаронцы зрабілі выснову, што Ігар Карней затрыманы ў межах крымінальнай справы — таму, паводле заканадаўства, праз 10 дзён яго мусяць альбо вызваліць, альбо высунуць абвінавачанне. Асцярогі пацвердзілася — Ігара Карнея перавялі з ізалятара часовага ўтрымання ў СІЗА № 1 на вуліцы Валадарскага ў Мінску, гэта азначала, што ў дачыненні да яго заведзеная крымінальная справа.

Дагэтуль няма ніякай інфармацыі ні пра сутнасць гэтай справы, ні паводле якога артыкула вінавацяць журналіста.

Вядома, што 15 лістапада 2020 года Ігара затрымлівалі падчас аднаго з мірных маршаў у Мінску. Тады яго пакаралі 10 суткамі адміністрацыйнага арышту, якія ён адбываў у ізалятары часовага ўтрымання ў Жодзіне.

У год арышту Ігар Карней у якасці фрылансера пісаў артыкулы для сайта «Крэва.Трэвел». І гэта не выпадковы занятак. «Ігар нарадзіўся ў вёсцы Наваспаск недалёка ад Крэва, затым “міграваў” з бацькамі па іншых адрасах на Смаргоншчыне. Пасля школы і службы ў войску скончыў факультэт журналістыкі БДУ, ад пачатку 1990‑х супрацоўнічаў з дзяржаўнымі і незалежнымі СМІ. Разнастайнасць тэмаў не перашкаджала “прызямляцца” на радзіме, дзе была асабістая зацікаўленасць у фіксацыі працэсу аднаўлення гістарычнай праўды і знакавых помнікаў», — гаворыцца пра аўтара на гэтым краязнаўчым сайце, тут жа можна пачытаць ягоны даробак для малой радзімы.

Увогуле, падарожжы — гэта ўлюбёны занятак Ігара з сям’ёй. Ад паездак па Беларусі да самых экзатычных кропак Лацінскай Амерыкі ці Азіі. Допісы Ігара ў сацсетках пасля такіх тураў чыталіся не менш цікава, чым ягоныя ж медыйныя рэпартажы. Ніколі не стамляецца здзіўляцца новаму, будзь гэта падарожжа кудысьці за акіян ці новая кружэлка цяжкой музыкі — гэта яшчэ адно захапленне Ігара.

«Ігар Карней — гэта чалавек, які заўжды адданы сям’і, сябрам, прафесіі, Беларусі», — адгукаюцца пра яго калегі і чакаюць на волі.

Падтрымаць зняволенага журналіста і павіншаваць паштоўкай ці тэлеграмай можна, напісаўшы на адрас: Ігару Пятровічу Карнею, СІЗА № 1, вул. Валадарскага, 2, 220030, г. Мінск.

Чытайце яшчэ:

«Калі ў хату ніхто не пагрукаў, на сёння і гэта вялікі пазітыў!» Калегі ў Беларусі пра адыходзячы год, мары, надзеі і пачуцці

У Беларусі анулявалі даменнае імя TUT.by

«Самае прыемнае, калі ёсць зваротная сувязь ад аўдыторыі». Незалежныя медыі падвялі вынікі года і падзяліліся планамі