Больш за 2300 паштовак са словамі падтрымкі: у Польшчы ладзяць акцыю салідарнасці з Анджэем Пачобутам

«Анджэй — палітвязень, які падвяргаецца катаванням, нягледзячы на ​​відавочныя праблемы са здароўем. Давайце пакажам, што мы пра яго не забыліся. Напішыце словы падтрымкі Анджэю і ягонай сям’і!» — просяць арганізатары акцыі на платформе Patron­ite.

На старонцы знаходзіцца форма для запаўнення, калі чалавек пажадае напісаць словы падтрымкі беларускаму журналісту. На гэты заклік на 3 студзеня ўжо адгукнулася 2332 чалавекі. Арганізатары запэўніваюць, што выбраныя паштоўкі будуць раздрукаваны і дастаўлены сям’і Анджэя. 

Анджэй Пачобут быў затрыманы 25 сакавіка 2021 года ў Гродне па так званай «польскай справе» разам з іншымі актывістамі Саюза палякаў Беларусі.

За артыкул пра напад СССР на Польшчу ў верасні 1939-га Анджэя Пачобута абвінавацілі ў «распальванні варожасці па нацыянальнай прыкмеце». У публікацыі Пачобут назваў агрэсіяй напад СССР на Польшчу 17 верасня 1939 года. Таксама ў матэрыялах крымінальнай справы фігуравалі заявы журналіста ў абарону польскай меншасці ў Беларусі, артыкул пра падаўленне беларускіх пратэстаў у 2020 годзе і тэкст ад 2006 года пра аднаго з камандзіраў польскага антыкамуністычнага падполля на Гродзеншчыне.

8 лютага 2023 года ў абласным судзе Гродна суддзя Дзмітрый Бубенчык прыгаварыў журналіста да 8 гадоў пазбаўлення волі з адбываннем у калоніі ўзмоцненага рэжыму.

26 траўня суддзя Вярхоўнага суда Беларусі Ігар Любавіцкі адхіліў апеляцыйную скаргу Анджэя Пачобута на вынесены яму прысуд. Разгляд скаргі адбыўся ў закрытым рэжыме.Пасля Анджэя перавялі са следчага ізалятара ў папраўчую калонію № 1 у Наваполацку.

У кастрычніку 2022 года КДБ РБ унёс Анджэя Пачобута ў спіс тэрарыстаў. 23 чэрвеня 2023 года прозвішча журналіста-палітвязня з’явілася і на сайце МУС РБ у пераліку грамадзян, якія «маюць дачыненне да экстрэмісцкай дзейнасці».

У снежні 2023 года Падчас саміту з нагоды 75‑й гадавіны прыняцця Усеагульнай дэкларацыі правоў чалавека прэзідэнт Польшчы Анджэй Дуда распавёў пра Анджэя Пачобута ў ААН. 

Чытайце яшчэ:

Улады пазбавілі БАЖ даменнага імя і пошты. БАЖ звяртаецца ў ICANN

«Лукашэнку люблю ўсім сваім сэрцам». Хто такая Віталіна Петрусевіч, якая стала тварам прапагандысцкіх фільмаў магілёўскага тэлебачання

Мінскі абласны суд будзе разглядаць апеляцыйную скаргу Аляксандра Манцэвіча 23 студзеня