Мінскі абласны суд будзе разглядаць апеляцыйную скаргу Аляксандра Манцэвіча 23 студзеня

Палітзняволены журналіст абскарджвае вырак, вынесены яму 3 лістапада 2023 года суддзём Маладзечанскага раённага суда Аляксеем Іршыным.  Ён прызнаў Аляксандра Манцэвіча вінаватым у дыскрэдытацыі Рэспублікі Беларусь паводле арт. 369–1 Крымінальнага кодэкса і прыгаварыў  да 4 гадоў пазбаўлення волі з адбыццём у калоніі ва ўмовах агульнага рэжыму. Таксама суддзя Іршын прызначыў журналісту штраф памерам 400 базавых велічынь, што складае 14 800 рублёў.

Былы рэдактар «Рэгіянальнай газеты» вінаватым сябе не прызнаў.  

Аляксандра Манцэвіча затрымалі 15 сакавіка 2023 года пасля ператрусу ў ягоным доме ў Вілейцы, а пасля 72 гадзін папярэдняга затрымання перавялі ў следчую турму № 8 Жодзіна (Мінская вобласць).

Абвінавачанне сцвярджала, што Манцэвіч, з’яўляючыся кіраўніком рэдакцыі газеты, сумесна з іншымі асобамі з 1 студзеня 2020 года па 15 сакавіка 2023 года нібыта «распаўсюджваў у друкаваным выданні і яго інтэрнэт-рэсурсах загадзя ілжывыя звесткі, якія дыскрэдытуюць Беларусь і яе органы ўлады». У красавіку 2023 года ўлады ўнеслі «Рэгіянальную газету» ў Рэспубліканскі спіс экстрэмісцкіх матэрыялаў.  

6 красавіка беларуская праваабарончыя супольнасць прызнала Аляксандра Манцэвіча палітычным вязнем.

Неўзабаве пасля вынясення прысуду, не чакаючы выніку абскарджання, Манцэвіча перавялі з жодзінскага следчага ізалятара ў СІЗА‑6 у Баранавічах. Сёлета ў жніўні рэдактару і журналісту споўнілася 65 гадоў, гэты юбілей ён сустрэў за кратамі.

Чытайце яшчэ:

Улады пазбавілі БАЖ даменнага імя і пошты. БАЖ звяртаецца ў ICANN

Шмат відэапраектаў, новыя сайты і інтэрнэт-кнігарня. Якія медыйныя праекты з’явіліся ў беларускай інфапрасторы ў другой палове 2023-га

1 студзеня дзень народзінаў адзначае за кратамі журналіст Ігар Карней. Яму спаўняецца 56 гадоў