Новы сямейны падрад: у «Мінскай праўдзе» выступае расіянін Вадзім Ялфімаў і яго сын

У дзяржаўных СМІ пры садзейнічанні Мінінфарма працягвае развівацца «аўтарская журналістыка», пад чым трэба разумець з’едлівыя калонкі на тэмы, у якіх аўтары, як правіла, не разбіраюцца, але кампенсуюць дылетанцтва нянавісцю да палітычных апанентаў, нізкаякаснымі жартамі, пераказам прапагандысцкіх баек і наўпроставай хлуснёй.

Такая мода прыйшла ў Беларусь разам з метадычкамі з Расіі і ўкаранілася пасля 2020-га. 

Імёны найбольш яскравых «аўтарскіх журналістаў» усім знаёмы, але іх шэрагі часам папаўняюцца. 

Здаецца, як і ў выпадку з Азаронкамі, вымалёўваюцца абрысы яшчэ адной прапагандысцкай дынастыі — Ялфімавых. 

Вадзім Ялфімаў — заходнерусіст, грамадзянін Расіі, які жыве ў Беларусі па ВНЖ. Нарадзіўся ў Малдове. Раней быў выкладчыкам журфака БДУ, дзе нічым сябе не праявіў. 

Ягоным «зорным» часам былі выступленні на БТ у 2010‑х. Пасля 2020-га жыццё дало яму яшчэ адзін шанец. Цяпер ён зноў выступае на тэлебачанні і піша калонкі ў «Мінскую праўду», дзе вылучаецца працаздольнасцю і манетызуе свае развагі з зайздроснай сістэмай: часам, па дзве калонкі ў дзень! 

Гэтым летам на старонках «Мінскай праўды» пачалі з’яўляцца калонкі і сына Вадзіма — Аляксея.

«Чаму жаданне насаліць Расіі вырачана на правал?», «Заходнія санкцыі могуць прывесці свет да голаду», «Як Байдэн давёў краіну да пуцінскага падатку» — такія артыкулы выдае 25-гадовы хлопец. 

Па словах суразмоўцаў «Нашай Нівы», ганарар за адну калонку ў «Мінскай праўдзе» складае каля 70 беларускіх рублёў, але можа быць і большым — у залежнасці ад «зорнасці» аўтара. 

Цяпер сям’я публікуецца ў літаральным сэнсе побач. 

Аляксей Ялфімаў, як і бацька — грамадзянін Расіі. Маці беларуска. Ён скончыў мінскую гімназію №61 і юрфак БДУ, тэма дыплома — «Роля СМІ ў рэалізацыі інфармацыйнай палітыкі Беларусі». 

Што адметна, выглядае, што да ўладкавання ў «Мінскую праўду» Аляксей нідзе, прынамсі афіцыйна, не працаваў — запісаў аб месцах работы ў базе аб выплаце сацыяльных унёскаў на Аляксея Ялфімава няма. 

Чытайце яшчэ:

17-гадовы аўтар «Прессбола» Раман Качына ізноў піша для выдання

Вядучая Марына Грыцук, якую вывозілі з Кіева «на танку», з’явілася на праўладным мерапрыемстве ў Мінску

«Ужо даволі даўно адчувала выгаранне»: журналістка змяніла працу ў рэдакцыі на этнафотасесіі