«Адчуваю сябе бездапаможным», — суд адмовіў Андрэю Павуку ў іску да міліцыі

“Я адчуваю сябе бездапаможным. Не ведаю нават, што рабіць, як абараняць сябе і сваю сям’ю. Падаецца, няма ўжо аніякага выбару, апроч як стаць радыкалам”, — сказаў пасля выніку суда Андрэй Павук карэспандэнту службы маніторынгу ГА “БАЖ”.

Нагадаем, што ў сакавіку супрацоўнікі крымінальнага вышуку Акцябрскага РАУС правялі ператрус у кватэры блогера, забралі камп’ютарную тэхніку, відэакамеру, мабільныя тэлефоны. Павук даглядаў дома пяцігадовую дачку. Міліцыя затрымала Андрэя, прымусіўшы яго пакінуць малалетнюю дачку адну ў кватэры, па сутнасці, у небяспечнай сітуацыі. 

Праваахоўнікі затрымалі блогера на пяць гадзін на той падставе, што нібыта з яго электроннага адраса ў Гомельскае ўпраўленне Міністэрства па надзвычайных сітуацыях паступіла паведамленне пра мініраванне Акцябрскага райвыканкама. Аднак скрыншота паведамлення ні міліцыянты, ні следчыя не паказалі.

Супраць Андрэя Павука завялі крымінальную справу паводле часткі 1 артыкула 340 Крымінальнага кодэкса— па факце паведамлення пра мініраванне райвыканкама. Максімальны тэрмін пакарання па згаданым артыкуле — да пяці гадоў пазбаўлення волі.

Гісторыя з ілжывым мініраваннем у звязку з блогерам Павуком паўтарылася 15 траўня. На электронную пошту Міністэрства па надзвычайных сітуацыях паступіла паведамленне пра мініраванне будынка суда ў Мазыры, дзе у той дзень меўся адбыцца суд над калінкавіцкім прадпрымальнікам і блогерам Віталём Манько. Ізноў западозрылі Павука. Супрацоўнік Акцябрскага РАУС Віктар Карпянок выклікаў блогера ў міліцыю, каб апытаць яго ў якасці сведкі пра “мініраванне” суда ў Мазыры.

Дзеянні супрацоўнікаў міліцыі блогер Павук абскарджваў раённаму, абласному і генеральнаму пракурорам. Ён прасіў таксама высветліць, хто выкарыстоўвае нумар яго мабільнага тэлефона ў такіх небяспечных гульнях. Аднак уцямнага адказу Андрэй Павук так і не атрымаўhttps://baj.media/be/content/genprakuratura-ne-zmagla-vysvetlic-hto-ad-imya-blogera-pavuka-minirue-dzyarzhustanovy. Тады ён звярнуўся ў суд з пазовам да Акцябрскага РАУС аб кампенсацыі нанесенай маральнай шкоды, якую блогер ацаніў у 25 тысяч рублёў.

Акцябрскі раённы суд 11 кастрычніка адхіліўhttps://baj.media/be/content/milicyya-ne-budze-vyplachvac-blogeru-pavuku-kampensacyyuпазоў блогера да райаддзела міліцыі. Суд стаў на бок міліцыянтаў і прызнаў, што ў службовых асоб меліся дастатковыя падставы падазраваць блогера ў здзяйсненні злачынства. Якія гэта падставы і чаму з імі не пазнаёмілі падазраванага блогера, адказу не было.

Блогер не пагадзіўся з высновамі суда першай інстанцыі і падаў апеляцыйную скаргу ў Гомельскі абласны суд, але і ён не знайшоў падставаў, каб адмяніць вынесенае Акцябрскім райсудом рашэнне.

Даверанай асобай блогера Павука ад ГА “БАЖ” у судзе выступаў юрыст Леанід Судаленка.

“У спрэчках паміж грамадзянінам і дзяржавай у нашых умовах перамагае дзяржава. У нас няма незалежнага суда, таму суддзі бароняць найперш дзяржаўныя інтарэсы. Андрэя Павука ў сакавіку міліцыянты затрымалі з прымяненнем кайданкоў, прымусілі пакінуць у кватэры без нагляду малалетнюю дачку. І суд услед за міліцыяй паўтарае: усё правільна, усё законна. Пры гэтым ніхто не называе тых прававых падставаў, якія давалі магчымасць затрымліваць блогера Павука”, — зазначыў юрыст Судаленка.

Новая правакацыя супраць АндрэяПавука — забойства, якога не было

«Скажы дзякуй, што нічога табе не падкінулі». Блогеру Андрэю Павуку даслалі пагрозы і абразы напярэдадні суда

“Караеў не дапамог». Блогеру Андрэю Павуку зноў шлюць пагрозы і абразы