Прысуд рэдактару «Рэгіянальнай газеты» Аляксандру Манцэвічу пакінулі без зменаў
23 студзеня 2024
23 студзеня Мінскі абласны суд разгледзеў апеляцыйную скаргу журналіста на вырак суда Маладзечанскага раёна, агучаны 3 лістапада мінулага года. Тады Аляксандру Манцэвічу прызначылі 4 гады калоніі і штраф памерам 14 800 рублёў. Зараз судовая калегія на чале з суддзём Уладзімірам Арэшкам пакінула скаргу без задавальнення і прысуд — без зменаў.
Журналіста абвінавацілі ў дыскрэдытацыі Рэспублікі Беларусь паводле арт. 369–1 КК. Яго справу разбіраў суддзя Маладзечанскага раённага суда Аляксей Іршын, дзяржабвінавачанне падтрымліваў памочнік пракурора — Аляксандр Марцінчык.
Паводле следства, Манцэвіч, з’яўляючыся дырэктарам рэдакцыі газеты, супольна з іншымі асобамі з 1 студзеня 2020 года па 15 сакавіка 2023 года «распаўсюджваў у друкаваным выданні і яго інтэрнет-рэсурсах заведама ілжывыя звесткі, якія дыскрэдытуюць Беларусь і яе органы ўлады»: нібыта «ў артыкулах змяшчалася недакладная інфармацыя, накіраваная на прычыненне істотнай шкоды дзяржаўным і грамадскім інтарэсам, падрыў аўтарытэту краіны і яе органаў улады, нанясенне ўрону нацыянальным інтарэсам, дэстабілізацыю абстаноўкі сярод грамадзян Беларусі, фарміраванне ілжывых уяўленняў аб невыкананні ў рэспубліцы правоў і свабод грамадзян».
Віны ў гэтым рэдактар выдання на прызнаў, што яшчэ раз пацвердзіў у сваёй апошняй прамове ў судзе.
Рэдактара «Рэгіянальнай газеты» Аляксандра Манцэвіча затрымалі летась 15 сакавіка пасля ператрусу ў ягоным доме ў Вілейцы. Першыя трое сутак пасля затрымання Манцэвіча ўтрымлівалі ў Маладзечанскім ізалятары часовага ўтрымання, і ў родных заставаліся спадзяванні, што ён выйдзе на волю. Аднак пасля прад’яўлення абвінавачання рэдактара «Рэгіянальнай газеты» перавялі ў Жодзінскую следчую турму № 8.
6 красавіка 2023 г. беларуская праваабарончая супольнасць прызнала Аляксандра Манцэвіча палітычным вязнем, зазначыўшы, што затрыманне і крымінальны пераслед рэдактара незалежнага выдання — гэта працяг мэтанакіраванай палітыкі ўладаў па абмежаванні распаўсюду непадцэнзурнай інфармацыі ў краіне і наступу на свабоду слова.
Свой 65-гадовы юбілей журналіст сустрэў за кратамі. 10 снежня мінулага года, у Дзень правоў чалавека, беларуская праваабарончая супольнасць абвясціла Аляксандра Манцэвіча лаўрэатам адмысловай прэміі, якой ён быў уганараваны завочна за адстойванне прававых каштоўнасцяў у галіне журналістыкі.
Чытайце яшчэ:
Генпракуратура завяла шэсць крымінальных спраў супраць супрацоўніка Радыё Свабода Сяргея Дубаўца
Фотаздымкі Уладзіміра Парфянка пакажуць на выставе ў Вільні
Дзяржсакратар Саюзнай дзяржавы сцвярджае, што гатовы праект пастановы аб стварэнні адзінай медыякампаніі. Што з ёй не так?
@bajmedia
