Міністэрства інфармацыі заблакавала доступ да сайту праекту «Медыякрытыка»

Пры спробе зайсці на сайт http://mediakritika.by з тэрыторыі Беларусі узнікае расійскамоўнае прабачэнне ад пастаўшчыкоў інтэрнэт-паслуг – у дадзеным выпадку з боку кампаніі «Космос ТВ».   

«Уважаемые пользователи! Доступ к ресурсу ограничен во исполнение решения Министерства информации, принятого на основании закона Республики Беларусь «О средствах массовой информации». Приносим извинения. ©Космос ТВ 220100, Минск». 

Маніторынг іншых ліцэнзаваных аператараў выдае аналагічны вынік – «бан» на патрабаванне кантрольнага ведамства. Пры гэтым прычыны радыкальнага рашэння звыкла не агучваюцца. 

«Медыякрытыка» імкнецца садзейнічаць павышэнню якасці беларускай журналістыкі праз стварэнне прафесійнага крытычнага медыя, – так акрэсліваюць сваю мэту ініцыятары праекту.   

Сайт mediakritika.by запрацаваў у 2012 годзе з ініцыятывы каардынатаркі праекту Яніны Мельнікавай і прысвечаны тэмам, важным для стваральнікаў і чытачоў беларускіх СМІ. Аўтары ініцыявалі дыскусіі аб унутраных праблемах, спрабуючы палепшыць якасць айчыннай журналістыкі. 

Такая пляцоўка для беларускай медыясупольнасці стала першым досведам знаходжання «па-над бойкай», дзе ў прафесійнай спрэчцы нараджалася ісціна. Дарэчы, такі ж і лозунг усёй кампаніі: «Ісціна любіць крытыку».   

Першапачаткова праект «Медыякрытыка» намагаўся казаць аб праблемах усяго журналісцкага цэха, не падзяляючы супрацоўнікаў СМІ на дзяржаўных і незалежных. Маўляў, настаў час прадметнай размовы адносна сапраўднай аналітыкі, аўтарскага права, прафесійнай этыкі і г.д. 

«Мы хочам, каб усе беларускія журналісты задумаліся, як не страціць  нашы прафесійныя стандарты. Гэта, па сутнасці, сяброўская размова калег аб тым, што рабіць і куды рухацца. Таму, са свайго боку, імкнёмся садзейнічаць павышэнню якасці тэкстаў праз стварэнне прафесійнага крытычнага медыя аб медыя для прафесіяналаў у галіне СМІ, медыяменеджараў, а таксама для шырокай аўдыторыі, якую цікавяць працэсы развіцця беларускай інфапрасторы», – вызначылі сваю ролю стваральнікі сайта.  

Да драматычнага 2020 году заяўленыя задачы экспертнай ацэнкі збольшага выконваліся, аднак з пачаткам татальнай зачысткі незалежных рэдакцый  паміж бюджэтнай прапагандай і нелаяльнымі апанентамі ўтварылася ідэалагічная прорва.   

Апошнім часам праект ужо быў валанцёрскім – прычым, нягледзячы на адсутнасць акаўнтаў у тэлеграм-каналах ды папулярных сацсетках, лічбы  праглядаў па-ранейшаму заставаліся даволі значнымі. Гэта азначае, што  журналісты па-ранейшаму заходзілі на платформу, каб атрымаць крытычны погляд на прадстаўлены кантэнт.   

І пры гэтым заснавальнікі разумелі, што нездаровы інтарэс з боку дзяржавы – справа агляднай бадучыні. Што і здарылася незадоўга да 11-годдзя «Медыякрытыкі» – Міністэрства інфармацыі ў аднабаковым парадку канстатавала забарону на доступ да інтэрнэт-старонкі.  

Новае вялікае даследванне пра сітуацыю ў беларускіх СМІ давядзецца пакуль адкласці, аднак, зазначаюць заснавальнікі ініцыятывы, ставіць кропку ніхто не збіраецца – нават дзеля прынцыпу.   

У «чорным спісе» кантрольнага ведамства ўжо сотні журналісцкіх рэсурсаў, заблакаваных выключна з‑за выказвання альтэрнатыўнай пазіцыі, якая не супадае з прапагандысцкімі канонамі.  

Чытайце яшчэ:

Журналіст Караль Гусеніца: Падзеі ў Беларусі ў 2020-ым былі важныя для палякаў праз агульнага ворага — Расію

Івулін прайграў заклад і пазваніў Мукавозчыку — папрасіцца на працу ў «СБ» і вярнуцца ў Беларусь

«Сіметрычны адказ ворагам Беларусі». Прапаганда апраўдваецца за татальную зачыстку медыйнай прасторы