Прадукцыю «Еўрарадыё» ў расійскіх сацсетках прызналі «экстрэмісцкімі матэрыяламі»

Як адзначаецца ў паведамленні кантрольнага ведамства, адпаведнае рашэнне прыняў 17 красавіка суд Светлагорскага раёна Гомельскай вобласці. Традыцыйна не ўдакладняецца, чым незалежная радыёстанцыя не дагадзіла менавіта гэтаму рэгіёну.

Такім чынам, у шэраг «экстрэмісцкіх» трапілі карпаратыўныя групы ў сацыяльных сетках, падкантрольных уладам Расіі. Гаворка пра старонку «Еврорадио — Новости Беларуси» ў «Одноклассниках» (ідэнтыфікатар https://ok.ru/euroradio), а таксама аналагічную пляцоўку «ВКонтакте» (ідэнтыфікатар https://vk.com/euroradio).

«Падлягае неадкладнаму выкананню ў адпаведнасці з арт. 314  Грамадзянскага працэсуальнага кодекса», — каментуе судовае рашэнне Мінінфармацыі, нагадваючы, што распаўсюд «экстрэмісцкай» прадукцыі цягне за сабой адказнасць ажно да крымінальнай у выпадку рэцыдыву.

Нагадаем, што сёлета 12 красавіка да такіх жа непажаданых у Беларусі інфармацыйных матэрыялаў суд Барысаўскага раёна аднёс старонку «Еўрарадыё» ў папулярнай сацсетцы Face­book. А яшчэ раней у «чорным спісе» уладаў з’явілася адпаведная група ў Insta­gram, а таксама YouTube і тэлеграм-канал медыярэсурсу. Экстрэмісцкім прызнаны нават лагатып «Еўрарадыё». 

Нагадаем, 20 ліпеня 2022 годв Міністэрства ўнутраных спраў аднаасобна абвясціла «Еўрарадыё» экстрэмісцкім фармаваннем – нібыта за «арганізацыю і каардынацыю пратэснай дзейнасці ў 2020 годзе».

У заяве з гэтай нагоды кіраўніцтва рэдакцыі адзначыла, што «ніколі не арганізоўвала і не каардынавала пратэсты», а карэспандэнты займаліся іх асвятленнем — так, як і належыць сапраўдным журналістам. І калі ўжо сілавікам захацелася наляпіць сваё кляймо на чарговае незалежнае медыя, дык у краіне, дзе «не да законаў», паўплываць на гэта немагчыма, — канстатуецца ў каментары.

Агулам у «экстрэмісцкім спісе» Міністэрства інфармацыі ўжо больш за 1500 найменняў інфармацыйнай прадукцыі СМІ, тэлеграм-каналаў, грамадскіх ініцыятываў і прыватных асобаў.

«Еўрапейскае радыё для Беларусі» («Еўрарадыё») — незалежная радыёстанцыя, заснаваная ў 2005 годзе ў Польшчы. Цягам 2009–2021 працаваў карэспандэнцкі пункт у Мінску, але на пачатку ліпеня 2021 года Савет міністраў Беларусі прыняў рашэнне яго ліквідаваць.  

«Еўрарадыё» вяшчае на беларускай мове ў FM-дыяпазоне на заходнюю частку Беларусі, паралельна распаўсюджваючы інфармацыю праз спадарожнік, інтэрнэт-сайт і старонкі ў сацсетках, пазіцыянуючы сябе як беларускае СМІ.

Місіяй радыёстанцыі дэкларуецца «прадастаўленне беларускім слухачам актуальнай, свежай, незалежнай, сучаснай і праўдзівай інфармацыі пра падзеі ў Беларусі і свеце, а таксама распаўсюд дэмакратычных каштоўнасцяў».

Што да мэтавай аўдыторыі, то да яе адносіцца ўсё насельніцтва Беларусі, якому аператыўна забяспечваецца інфармацыйны прадукт розных жанраў — навінавыя, музычныя, аналітычныя, забаўляльныя праграмы.  

Чытайце яшчэ:

Сегодня 37 лет со дня трагедии на Чернобыльской АЭС

«Калі рэжым Лукашэнкі будзе зрынуты, то, напэўна, добрыя стасункі паміж украінцамі і беларусамі адновяцца». Гутарка з рэдактаркай «ВалыньPost» Іванкай Рудзішын

Як не даць сябе зламаць? Івулін — пра гатовых і не гатовых да зоны, віну перад іншымі вязнямі і карму лукашыстаў