Журналіста светлагорскага «Ранка» аштрафавалі

Як паведамляюць праваабаронцы, 2 жніўня ў кватэры Андрэя Ліпскага прайшоў ператрус. Журналіста абвінавачвалі у  «знявазе і пагрозах у Telegram-чаце ў адрас супрацоўніка Следчага камітэта». У выніку канфіскавалі два смартфона: уласна рэпарцёра і яго маленькай дачкі.

Пасля вобыску Ліпскага даставілі ў РАУС, дзе склалі ратакол пра «экстрэмісцкія матэрыялы». Падставай сталі падпіскі на групы «Жыве Беларусь» і «Телеканал «Прямий» у YouTube, а таксама на  групу «Чай с малиновым вареньем» ў сацсетцы «У кантакце». Усе гэтыя групы беларускія ўлады ўнеслі ў спіс «экстрэмісцкіх». Да суда Андрэй Ліпскі  трапіў у ізалятар часовага ўтрымання Светлагорскага РАУС.

3 жніўня, усё тая ж журналісту прысудзілі штраф у 20 базавых велічынь і канфіскацыю смартфона у прыбытак дзяржаве.

Праблемы ў інфармацыйнага цэнтра «Ранак» пачаліся 9 чэрвеня бягучага года, калі сілавікі ГУБАЗіКа затрымалі дзевяць супрацоўнікаў «Ранак-медыя» і «Ранак-рэклама».

Пасля маштабнага ціску супрацоўнікі «Ранак-медыя» і «Ранак-рэклама» пачалі звальняцца, сярод іх і тыя, хто меў непасрэднае дачыненне да журналісцкай працы.

Афіцыйнай прычынай адміністрацыйнага пераследу супрацоўнікаў медыя назвалі нібыта подпісы на групу «Светлік. Светлагорск» у сацсетцы «Одноклассники», хоць яна, наколькі вядома, не ўнесеная ў спіс «экстрэмісцкіх».

Абазнаная ў сітуацыі крыніца схільная лічыць, што сапраўдны матыў палягае ў асвятленні тэлекампаніяй аварыі на заводзе беленай цэлюлозы Светлагорскага цэлюлозна-картоннага камбіната, якая здарылася 7 чэрвеня і ў выніку якой загінулі трое работнікаў завода. Тэлекампанія першай паведаміла пра надзвычайнае здарэнне з выбухам і чалавечымі ахвярамі.

Прыватная тэлерадыёкампанія «Ранак» была заснаваная ў Светлагорску два дзесяцігоддзі таму прадпрымальнікам Ігарам Кашлікавым. Высілкамі дырэктара неўзабаве тут утварылі яшчэ і прыватнае прадпрыемства «Ранак-рэклама». Займаліся рэкламай, паліграфіяй, СМІ. У рэгіёне ТРК стала заўважнай інфармацыйнай структурай. Паводле яе ўласных ацэнак, аўдыторыя кампаніі — гэта 100 тысяч жыхароў горада і раёна. Дарэчы, практыку інфармавання насельніцтва тэлерадыёкампаніяй вывучалі нават дэпутаты мясцовых саветаў, наведваючы створаны тут медыяхаб «Гарышча» (па-руску — «Чердак»).

Заснавальнік і ўласнік кампаніі Ігар Кашлікаў праз прэтэнзіі падатковай службы ў 2021 годзе пакінуў межы Беларусі, даверыўшы выконваць абавязкі кіраўніка  галоўнаму рэдактару Вадзіму Вежнаўцу.

Чытайце яшчэ:

Ужо дома: міліцыя адпусціла рэдактарку светлагорскай кампаніі «Ранак»

Сёння стала вядома пра затрыманне тры дні таму журналіста-фрылансера

Озираясь на три года назад. Репортерский взгляд на август-2020