Сяргей Навумчык сыходзіць з журналістыкі на пенсію. У штаце «Радыё Свабода» ён прапрацаваў 25 гадоў

«Я сыходжу з «Радыё Свабода» — якраз цяпер спаўняецца 25 гадоў працы ў штаце РС, і гэта, я лічу, добрая нагода, каб скарыстацца з аднаго боку дасягненнем мінімальнага пенсійнага ўзросту, усталяванага для грамадзянаў ЗША (62 гады), а з другога — неабходнага па тым жа амерыканскім заканадаўстве працоўнага стажу, які я нават перавысіў ледзь не ў тры разы. Гаворка менавіта пра заробленую, а не сацыяльную пенсію (ніякіх сацыяльных выплат ад ЗША я ніколі не меў ні цэнту)», — растлумачыў прычыны свайго сыходу Сярей Навумчык.

Падчас сваёй працы журналіст, дзякуючы «Радыё Свабода», змог падрыхтаваць зборнікі публіцыстыкі Васіля Быкава, успаміны Івонкі Сурвілы (абедзве кнігі ў серыі «Бібліятэка Свабоды. XXI стагоддзе» выйшлі двума выданнямі), Святланы Алексіевіч, кнігі рэпартажаў пра Алеся Бяляцкага і Станіслава Шушкевіча.

Да таго ж выдаць уласныя кнігі пра першую палову 90‑х.

«Гады нацыянальнага Адраджэння, абарванага антыбеларускімі сіламі. Я ніколі не напісаў бы гэты мемуарны цыкл, калі б не працаваў на РС. Шчыра дзякую калегам за тое, што ў часы працы над кнігамі яны бралі на сябе частку будзённай чарнавой журналісцкай працы», — падкрэсліў журналіст.

Сяргей Навумчык нарадзіўся ў 1961 годзе ў Паставах. У 1963 годзе з бацькамі пераехаў у Віцебск. Скончыў факультэт журналістыкі БДУ, служыў у войску, працаваў у віцебскай абласной газеце. Публікаваў артыкулы ў абарону архітэктурнай спадчыны Віцебску. У 1988 годзе быў ініцыятарам грамадскай кампаніі супраць будаўніцтва Віцебскай АЭС, удзельнічаў ва ўстаноўчым сходзе таварыства «Мартыралёг» і Беларускага Народнага Фронту 19 кастрычніка 1988 г.

З сакавіка 1990 па студзень 1996 — дэпутат Вярхоўнага Савету Беларусі 12-га склікання, быў каардынатарам парламенцкай апазіцыі БНФ. Удзельнічаў у распрацоўцы і прыняцці Дэкларацыі аб дзяржаўным суверэнітэце Беларусі. Удзельнічаў у галадоўцы дэпутатаў Апазіцыі БНФ 11–12 красавіка 1995 года супраць ініцыяванага Лукашэнкам т. зв. рэферэндуму аб ліквідацыі статусу беларускай мовы як адзінай дзяржаўнай, ліквідацыі статусу дзяржаўных сімвалаў — герба «Пагоня» і бел-чырвона-белага сцяга, эканамічнай інтэграцыі з Расіяй і праве прэзідэнта распускаць парламент. Быў адным з заснавальнікаў Беларускай асацыяцыі журналістаў і Беларускага Хельсінскага камітэту.

У жніўні 1996 года атрымаў палітычны прытулак у ЗША. З 1999 — супрацоўнік «Радыё Свабода». 

Чытайце яшчэ:

Генпракуратура завяла шэсць крымінальных спраў супраць супрацоўніка Радыё Свабода Сяргея Дубаўца

«Беларускае Радыё Рацыя» таксама прызналі «экстрэмісцкім фарміраваннем»

Барысаўскага фатографа Аляксандра Зянкова прызналі палітзняволеным