Рыгор Кастусёў будзе адбываць прысуд у калоніі ў Івацэвічах

“Закінулі ажно ў Івацэвіцкі раён. Як планавалася, і прасіўся на Магілёў ці Шклоў, во бач, як збылося. Дабіраліся па этапу доўга. Тут такая працэдура. Выдалі зэкаўскую форму. Усё, што небходна. Пастрыгся налыса, давялося збрыць вусы. Вось такія мае навіны”, — напісаў палітык у лісце да жонкі Ларысы.

Зараз Рыгор Андрэевіч пакуль знаходзіцца ў папраўчай калоніі на каранціне разам з іншымі зняволенымі, што прыбылі па этапу. Пасля яго размяркуюць у адзін з атрадаў.

65-гадовы палітык спадзяваўся, што яго накіруюць адбываць пакаранне ў Шклоў ці Магілёў — каб родным было зручней яго адведваць. Падаваў адпаведную заяву ў Дэпартамент выканання пакаранняў МУС, але яе чамусьці не задаволілі.

У апошнія месяцы знаходжання ў СІЗА №2 на вуліцы Валадарскага ў Мінску атрымліваў лісты толькі ад жонкі, паведамленні ад іншых людзей да яго папросту не даходзілі.

Кастусёва затрымалі ў Шклове 12 красавіка 2021 года. Пазней стала вядома, што Рыгор Кастусёў, палітолаг Аляксандар Фядута і юрыст Юрый Зянковіч абвінавачаныя ў змове з мэтай захопу дзяржаўнай улады неканстытуцыйным шляхам (ч. 1 арт. 357 Крымінальнага кодэкса).

Спачатку яго ўтрымлівалі пад арыштам у СІЗА КДБ, пазней перавялі ў СІЗА №1 на вуліцы Валадарскага ў Мінску. Ужо за кратамі ў Рыгора Андрэевіча ўрачы дыягнаставалі анкалагічнае захворванне. Аднак, нягледзячы на гэта, меру ўтрымання яму так і не змянілі.

Праваабарончая супольнасць Беларусі прызнала Рыгора Кастусёва палітвязнем.

Генпракуратура 9 чэрвеня 2022 года паведаміла, што справу «аб змове з мэтай захопу дзяржаўнай улады» накіравалі ў суд. Разгляд справы пачаўся 29 ліпеня 2022 года. Сваю віну Кастусёў не прызнаў.

30 жніўня дзяржаўны абвінаваўца Міхаіл Кавалёў запатрабаваў для палітвязня 12 гадоў зняволення. 5 верасня суддзя Мінскага абласнога суда Уладзімір Арэшка прызнаў Рыгора Кастусёва вінаватым і прысудзіў яму 10 гадоў зняволення ў калоніі ва ўмовах узмоцненага рэжыму.

Кастусёў падаваў апеляцыйную скаргу на рашэнне Мінскага абласнога суда ў Вярхоўны суд Рэспублікі Беларусь, але 29 лістапада Вярхоўны суд адмовіў у яе задавальненні, пакінуўшы прысуд у сіле.

На працягу многіх гадоў Рыгор Кастусёў з’яўляўся сябрам грамадскага аб’яднання “Беларуская асацыяцыя журналістаў”.

Чытайце яшчэ: 

Улады паведамілі, колькі сайтаў і ТГ-каналаў яны заблакавалі

Журналіст Дзмітрый Семчанка з‑за кратаў: «Прыемна ўвага, якая надае сэнс маім учынкам»

Новый рекорд числа журналистов, находящихся в заключении по всему миру