Гродзенскі блог s13.ru аштрафавалі за фотавыявы алкаголю

Судовы працэс адбыўся 20 лістапада 2017 года ў Ленінскім райсудзе Гродна. Суддзя Алена Пятрова прызнала ўладальніка s13.ru вінаватым у парушэнні закона “Аб рэкламе”.

Пра пачатак адміністрацыйнай справы Сяргей Чабоцька даведаўся напрыканцы кастрычніка з пісьмовага ўведамлення, дасланага Гродзенскім гарвыканкамам.  У лісце паведамлялася, што паступіла скарга: на сайце s13.ru  размешчаныя фотаздымкі, якія супярэчаць закону  аб рэкламе. У прыватнасці, у двух  публікацыях былі выявы з алкаголем, якія забаронена распаўсюджваць у Беларусі без адмысловых пазнак.

“Такія фотаздымкі сапраўды ілюстравалі публікацыі. Адна з іх мела сацыяльную накіраванасць, – распавядае Сяргей Чабоцька. – У публікацыі большую частку займала гутарка з урачом-нарколагам пра небяспеку ўжывання алкаголю. Другі здымак быў у артыкуле пад назвай “Саўмін павялічыў квоты на выпуск “чарнілаў”. Сам загаловак мае пад сабой нейкую іронію і зразумела, што ніхто нічога не рэкламаваў і ніякіх кантрактаў ні з кім не заключаў”.

Сяргей Чабоцька прызнае факт таго, што ненаўмысна парушыў закон, і гэта падцвердзіў падчас судовага пасяджэння. Абскарджваць рашэнне суда журналіст не збіраецца.

Падчас разгляду справы Чабоцькі стала вядома, што скаргу на блог s13.ru накіравала КУП “Гроднааблкінавідэапракат”. Цікавы факт: на пачатку 2017 года гэтае прадпрыемства таксама атрымала штраф па гэтым жа артыкуле за парушэнне “Закона аб рэкламе”.

Нагадаем, што КУП “Гроднааблкінавідэапракат” зараз судзіцца з парталам Hrodna.life і журналісткай Веранікай Вельб.