Як праходзіць суд на Ірынай Слаўнікавай: бацьку на пасяджэнне не пусцілі

Яшчэ апалове на дзясятую на інфармацыйным стэндзе суда не было пазначана, што суд закрыты. Але ўжо праз пятнаццаць хвілін з’явілася новая абвестка: судовае пасяджэнне па справе Ірыны Слаўнікавай закрытае. 

Падтрымаць Ірыну прыехаў бацька Аляксандр, некаторыя сваякі і калегі, але нікога з іх у судовую залу не пусцілі.

Убачыць Ірыну ўдалося праз адчыненыя дзверы, калі ў залу заходзілі афіцыйныя ўдзельнікі працэсу. Ірына ў светлай кофце, у яе акуратная кароткая стрыжка, у судовай «клетцы» за бранявым шклом выглядала засяроджанай. 

Аляксандр Слаўнікаў кажа, што ў красавіку, калі завяршылася следства, ён меў спатканне з дачкой у Мінску на Валадарцы. Яна трымалася годна, разумеючы сваю правату і невінаватасць. Абвінавачанняў не прызнавала. Сукамерніцы, якія ведалі журналістку, наогул казалі бацьку: «Ірына – герой». 

На пачатку чэрвеня Слаўнікаву перавялі з Валадаркі ў гомельскае СІЗА‑3, адкуль яе сёння і даставілі ў суд пад міліцэйскім канвоем. Абараняе Ірыну адвакат Уладзімір Пыльчанка, але ніякай інфармацыі па справе ён не дае.«З мяне ўзялі падпіску пра неразгалошванне», – зазначае адвакат.

Журналістку Ірыну Слаўнікаву разам з мужам Аляксандрам Лойкам затрымалі 30 кастрычніка 2021 года ў Нацыянальным аэрапорце, калі  яны вярталіся з адпачынку ў Егіпце. Сужэнцаў адправілі за краты пад адміністрацыйны арышт нібыта за «распаўсюд экстрэмісцкіх матэрыялаў», а потым і за «дробнае хуліганства». 

Аляксандра Лойку праз 45 сутак адпусцілі, а Ірына пасля месячнага адміністрацыйнага арышту на волю так і не выйшла. 

Пазней стала вядома, што журналістку зрабілі падазраванай у крымінальнай справе па «арганізацыі і падрыхтоўцы дзеянняў, якія груба парушаюць грамадскі парадак». А сёлета ў красавіку падчас спаткання бацька Ірыны даведаўся, што дачцэ дадалі яшчэ і новае абвінавачанне – «стварэнне экстрэмісцкага фармавання». 

Следчы камітэт сцвярджаў, што падчас расследавання крымінальнай справы нібыта атрыманыя доказы, што менавіта Слаўнікава была кіраўніцай «Белсата», прызнанага ў Беларусі «экстрэмісцкім фармаваннем». Санкцыі паводле новага крымінальнага артыкула – да 7 гадоў няволі.

Ірына Слаўнікава нарадзілася ў Гомелі ў сям’і вайскоўца. Па адукацыі яна – эканаміст. Працавала па спецыяльнасці ў камерцыйных фірмах, пасля бухгалтарам у газеце «Беларуская маладзёжная», дзе і захапілася журналістыкай.

Калі на пачатку 2000‑х бацькі паехалі ў Германію, з імі выправілася туды і Ірына. Займела яна ў Нюрнбергу нават від на жыхарства. Але вытрымала ў чужой краіне толькі год – вярнулася назад у Беларусь. 

У 2007 годзе быў створаны беларускамоўны тэлеканал «Белсат», які трансляваў перадачы з Польшчы, але так і не быў зарэгістраваны ў Беларусі пасля паўдзесятка зваротаў да ўладаў. Слаўнікава супрацоўнічала з тэлеканалам, брала чынны ўдзел ў праваабарончай праграме «Маю права». Яна ўступіла ў шэрагі ГА «Беларуская асацыяцыя журналістаў» і на з’ездзе сяброў аб’яднання ў красавіку 2021 года была абраная адным з намеснікаў старшыні.

На момант затрымання Ірына Слаўнікава ўжо працяглы час не супрацоўнічала з «Белсатам», а з’яўлялася штатнай супрацоўніцай польскага тэлеканала TVP.

Чытайце яшчэ:

Тры адметныя факты пра Ірыну Слаўнікаву

Муж Ірыны Слаўнікавай: Тое, што цяпер адбываецца, яе не зламае

Аксана Колб: «У Беларусі шмат годных людзей. А дзе ж з імі яшчэ сустрэцца, як не за кратамі?»