У Брэсце чыноўнікі азадачыліся, чаму людзі менш чытаюць дзяржаўныя газеты. Выйсце шукаюць у працы з блогерамі

«Праблема не ў тым, што ў гарадах менш чытаюць газет: пытанне ў змесце напісанага», — выказаў меркаванне памочнік Аляксандра Лукашэнкі — інспектар па Брэсцкай вобласці Валерый Вакульчык.

Паводле яго словаў, трэба напоўніць газеты тым, што будзе цікава і запатрабавана. Сярод хвалюючых тэм Валерый Вакульчык пералічыў праблемы якасці рамонту, жыллёва-камунальных паслуг і шмат чаго іншага. «Чалавек павінен давяраць СМІ, разумець, што журналісты — вочы і вушы кіраўнікоў, у тым ліку губернатара», — адзначыў чыноўнік.  

У прыватнасці, у Брэсцкай вобласці для эфектыўнай зваротнай сувязі з чытачамі ўсе рэдакцыі ў месцах, якія найбольш наведваюцца, размясцілі інфармацыю з QR-кодамі. Сканаваўшы іх, можна аператыўна звязацца з журналістамі па любым хвалюючым пытанні.

Для хуткай камунікацыі створаны і чат-боты ў Telegram. Аднак там, каб пакінуць паведамленне альбо скаргу, трэба абавязкова дадаць свае асабістыя дадзеныя і нумар тэлефона.

Чыноўнікі таксама пахваліліся ідэяй стварэння медыяхолдынгаў у рэгіёне. Адзін з іх створаны на базе брэсцкай абласной газеты «Заря» (да яе далучылі тры былыя раёнкі), другі сфармаваны пад дахам гарадской газеты «Пінскі веснік». Такім чынам зараз сістэма мясцовых дзяржаўных СМІ Брэсцкай вобласці змянілася: яе прадстаўляюць 17 рэдакцый газет — адна абласная, тры аб’яднаныя (Брэст, Баранавічы, Пінск), 13 раённых выданняў.

Як сцвярджаюць мясцовыя ідэолагі, мінулы год паказаў сваю эфектыўнасць: новы фармат дазволіў, на іх думку, павялічыць арыгінальны аналітычны кантэнт і колькасць творчых матэрыялаў. Пры гэтым міністр інфармацыі Уладзімір Пярцоў, які браў удзел у пасяджэнні Брэсцкага аблвыканкама, упэўнена заявіў, што са ставарэннем медыяхолдынгаў ніводная газета не знікла.  

Пры гэтым Уладзімір Пярцоў прызнаў, што газета застаецца сродкам камунікацыі з людзьмі сярэдняга і старэйшага ўзросту. «Маладыя людзі аддаюць перавагу ў асноўным чэрпаць інфармацыю ў лічбавым асяроддзі. Разумеючы гэта, рэгіянальныя СМІ ў Брэсцкай вобласці шукаюць новыя падыходы для прыцягнення спажыўцоў кантэнту», — паведаміў міністр інфармацыі.

Больш падрабязна на гэтую тэму выказалася начальнік галоўнага ўпраўлення ідэалагічнай працы і па справах моладзі Брэсцкага аблвыканкама Таццяна Гагакава. Паводле яе словаў, «праца ў інтэрнэт-прасторы — задача №1 для сучаснага СМІ, а таму мы пайшлі па шляху прыцягнення да працы ў рэдакцыях блогераў».

Як высветлілася, з пачатку 2024 года ў абласной газеце «Заря» працуе папулярны брэсцкі блогер (імя яго на пасяджэнні аблвыканкама не назвалі), а яшчэ адзін будзе з 1 лютага прадстаўлены ў «Кобрынскім весніку».

«Спадзяемся, што такая практыка сябе апраўдае і праца з блогерскай супольнасцю пазітыўна паўплывае на якасць інфармацыйнага суправаджэння рэгіёнаў», — распавяла Таццяна Гагакава.

Яна таксама дадала, што сродкі масавай інфармацыі вобласці разглядаюцца цяперашнімі ўладамі як «важны інструмент дзяржаўнай інфармацыйнай палітыкі» і мусяць адпавядаць сучасным патрабаванням.

Пасля пасяджэння аблвыканкама Уладзімір Пярцоў наведаў рэдакцыю газеты «Заря». Там ён нагадаў пра электаральную кампанію, падчас якой трэба «аператыўна і якасна даносіць праўдзівую інфармацыю аб падзеях у краіне і свеце». На думку міністра інфрамацыі, «толькі журналіст можа стварыць якасны матэрыял: не smm-спецыяліст, не капірайтар і не мясцовы блогер».

А яшчэ Уладзімір Пярцоў заявіў, што ў Беларусі выбудавана нейкая «дзейсная сістэма падачы інфармацыі, але недзе яе трэба завастрыць і перафарматаваць: у Брэсцкай вобласці гэта ўдалося выканаць на 97%».

Чытайце яшчэ:

«У мяне і так працы шмат, а тут яшчэ вамі, бэчэбэшнікамі, займацца». Гісторыя Яўгена Сухаверха — у выразах, пачутых ад сілавікоў

Барыс Хамайда на волі. Былога распаўсюджвальніка незалежнага друку будуць судзіць 2 лютага

«СБ. Беларусь сегодня» зменшыла наклад. Але маніпулятыўна ўдвая завышае рэальную колькасць асобнікаў