Фатограф падаў на конкурс выяву, створаную штучным інтэлектам. І перамог

Нямецкі фотамастак Барыс Эльдагсэн падаў заяву на міжнародны фотаконкурс Sony World Pho­tog­ra­phy Award. Ён заявіў на конкурс фота, якое было створана штучным інтэлектам і, нечакана для сябе, перамог у намінацыі «Крэатыў».

Пра гэты выпадак 18 красавіка напісала агенцтва Бі-бі-сі.

На згенераваным фотаздымку пад назвай Pseudom­ne­sia: The Elec­tri­cian («Псеўдамнезія: Электрык»), які быў створаны ў чорна-белых колерах, на першы погляд, няма ніякіх рэчаў, якія сведчылі б пра тое, што ён зроблены штучным інтэлектам. На ім адлюстраваны две звычайныя жанчыны розных пакаленняў, адна з якіх абдымае другую за плечы.

Гэтая выява перамагла ў конкурсе, пасля чаго Эльдагсэн адразу ж прызнаўся, што яна несапраўдная.

«Дзякуй, што выбралі мой фотаздымак і зрабілі гэты момант гістарычным, паколькі гэта першая выява, створаная штучным інтэлектам, якая перамагла ў прэстыжным міжнародным фотаконкурсе. Колькі з вас ведалі ці падазравалі, што яна была згенеравана штучным інтэлектам? Ці не падаецца вам, што нешта тут не так?» — заявіў Барыс Эльдагсэн адразу ж пасля заканчэння конкурсу.

Пасля гэтага ён дадаў, што выкарыстаў гэтую несапраўдную выяву для таго, каб ацаніць ступень падрыхтоўкі прэстыжных міжнародных конкурсаў да з’яўлення штучных твораў і «пачаць грамадскую дыскусію аб будучыні фатаграфіі як мастацтва».

І таму Эльдагсэн вырашыў адразу ж адмовіцца ад атрыманай узнагароды.

«Фоты, зробленыя штучным інтэлектам, не павінны на роўных умовах канкураваць з сапраўднымі фатаграфіямі. ШІ — гэта не фота, гэта два асобныя кірункі. Я не магу прыняць ўзнагароду», — скончыў фотамастак.

Аднак у Сусветнай арганізацыі фатаграфіі афіцыйна заявілі ў адказ, што Эльдагсэн яшчэ да аб’яўлення імёнаў пераможцаў у конкурсе згадваў, што яго праца зроблена пры дапамозе штучнага інтэлекту.

Прэс-служба арганізацыі адзначыла, што вітае такія «эксперыментальныя падыходы да стварэння выяў», таму праца Эльдагсэна прайшла на конкурс і нават змагла перамагчы.

Нагадаем, што яшчэ ў канцы сакавіка па інтэрнэце сталі разыходзіцца нібыта рэальныя фатаграфіі Папы Рымскага ў пухавіку і Дональда Трампа, якога пераследуюць шмат паліцыянтаў. 

Такія праўдападобныя фэйкі вымусілі сэрвісы па стварэнні выяў пры дапамозе штучнага інтэлекту значна абмежаваць іх вольнае выкарыстанне.

Чытайце яшчэ: 

Остаться в профессии. Вся помощь журналистам и медиа по одной ссылке

Медиаэкспертка: «Если бы меня спрашивали, поступать ли сегодня на факультет журналистики — однозначно, безусловно нет»

Браты Сяргей і Аляксандр Сацукі адзначаюць юбілей. Першы — у калоніі, другі — у эміграцыі