Двойчы «ўганараваны». Журналіст Дзмітрый Навоша цяпер і «экстрэміст», і «тэрарыст»

Як вынікае са спісу на сайце Міністэрства ўнутраных спраў, адкарэктаванага адразу за два тыдні (у доўгія выходныя на Дзень перамогі база не абнаўлялася), там зноў прадстаўнікі медыйнай галіны: пад нумарам 2853 (з агульных 2868 «экстрэмістаў») сузаснавальнік парталаў Tribuna.com і Sports.ru Дзмітрый Навоша і на 2861‑м радку былая менеджарка дзяржаўнага тэлеканала «Беларусь 2» Вольга Гладкая. 

Адметна, што ў графе «даведачная інфармацыя» насупраць Дзмітрыя Навошы пазначана «адбывае пакаранне», хоць насамрэч журналіст даўно за мяжой і нават завочна не прысутнічаў на судзе паводле так званай спецвытворчасці. Для яго гэта ўжо другое «статуснае ўганараванне»: у лістападзе 2022 года трапіў у пералік асобаў, датычных да тэрарыстычнай дзейнасці. Свой «чорны спіс» складае Камітэт дзяржбяспекі.  

Што да Вольгі Гладкай, яе статус прынамсі адпаведны рэльнасці: «судзімасць не пагашаная».  

45-гадовы Дзмітрый Навоша праходзіў фігурантам крымінальнай справы разам з Янінай Сазановіч, Даніілам Багдановічам, Валерыяй Занямонскай і Вольгай Высоцкай. Летась у сярэдзіне снежня працэс у закрытым рэжыме пачала суддзя Мінскага гарадскога суда Наталля Бугук, прычым ніхто з абвінавачаных на працэсе не прысутнічаў, ім прызначылі неназваных дзяржаўных абаронцаў.

Усіх пецярых вінавацілі на падставе крымінальных артыкулаў аб  «распальванні сацыяльнай варожасці» (ч. 3 арт. 130 КК) і «незаконных  дзеяннях датычна персанальных дадзеных» (ч. 3 арт. 203–1 КК). У прыватнасці, ім інкрымінавалася адміністраванне Telegram-канала, дзе апублічваліся персанальныя звесткі ініцыятараў і выканальнікаў гвалту падчас акцый пратэсту-2020. Маўляў, аб’ядналіся ў «злачынную групу», у складзе якой стварылі розныя інтэрнэт-рэсурсы з мэтай «дыскрэдытацыі  ўлады і праваахоўных органаў, распальвання сацыяльнай варожасці і нянавісці ў дачыненні да сілавога блоку і дзяржслужачых».

Следчы камітэт Беларусі пачаў працэс «спецыяльнай вытворчасці» пры канцы верасня 2022 года. Сёлета 10 студзеня прадстаўнік пракуратуры запатрабаваў па 12 гадоў зняволення для кожнага — максімальна магчымы. Праз тыдзень суддзя просьбу задаволіла нават у большым аб’ёме: у дадатак да ўхваленага тэрміну яшчэ па 18 500 рублёў штрафу.

46-гадовую экс-супрацоўніцу Нацыянальнай тэлерадыёкампаніі Вольгу Гладкую затрымалі сёлета 27 лютага і неўзабаве прад’явілі абвінавачанне ў «арганізацыі і падрыхтоўцы дзеянняў, якія груба парушаюць грамадскі парадак» (ч. 1 арт. 342 Крымінальнага кодэкса). Абаронцы спрабавалі дамагчыся вызвалення Вольгі Гладкай пад грашовы заклад, паколькі яна мае праблемы з сэрцам і патрабуе пастаяннага медыкаментознага лячэння, аднак хадайніцтвы праігнаравалі. Праваабаронцы прызналі яе палітзняволенай.  

Працэс пачаўся ў судзе Маскоўскага раёна Мінска 2 траўня, а праз тры дні суддзя Лідзія Целіца пакарала жанчыну 3 гадамі абмежавання волі без накіравання ва ўстанову адкрытага тыпу.

Вольга Гладкая — экс-менеджарка канала «Беларусь 2». Яна звольнілася з Белтэлерадыёкампаніі ў верасні 2020-га, каб паспрабаваць сябе ў сферы ІТ. Аднак рашэнне супала з масавымі пратэстамі супраць фальсіфікацыі прэзідэнцкіх выбараў і гвалту сілавікоў, да карпаратыўнага страйку далучыліся і многія супрацоўнікі дзяржаўных каналаў. На гэтай падставе ўлады пакаралі пазбаўленнем волі цэлы шэраг работнікаў дзяржСМІ, а некаторым праз пераслед давялося тэрмінова пакінуць Беларусь. 

Чытайце яшчэ:

Мова міру супраць мовы вайны. Хто фармуе наратывы і нясе за іх адказнасць

«Вариантов тут у меня нет». Как живут беларуские «террористы» после освобождения

13 гадоў таму не стала журналіста Сяргея Буткевіча