Андрэй Пачобут: «Я не маю ніякіх ілюзій наконт прысуду»

Андрэй Пачобут у лісце з‑за кратаў напісаў: «Ідзе 17 месяц майго зняволення. Калі азіраюся назад, дык здаецца яшчэ нядаўна я быў у Жодзіна і пазнаваў, ці лепш сказаць знаёміўся, з «турэмнымі ўніверсітэтамі», а ужо хутка канец следства і перадача справы ў суд.

Хоць, канешне, я не маю ніякіх ілюзій наконт прысуду, але ўсё адно хочацца хутчэй мець гэта за сабой і ехаць у лагер. 

Дарэчы ў маі 2021 года, калі я этапам ехаў з Валадаркі ў Жодзіна — гэта быў самы прыемны момант майго зняволення. Цягнік вырваў з турэмнай статыкі, вецер праз адкрытую канваірамі фортку — была спёка — нагадваў пра волю…

Цёплая атмасфера ў камеры-купэ — хлопцы ўсе палітычныя ехалі пасля прысудаў у лагеры з вялікімі — як мне тады здавалася прысудамі — 3, 4, 7 гадоў пазбаўлення волі… Я быў адзіны ў каго не было яшчэ суду.

Што ж мінула з таго часу ўжо больш за год, шмат чаго змянілася, але не гледзячы на гэта настрой у мяне бадзёры, а натхненнем служаць лёсы людзей, якія сядзелі ў сталінскія часы. Шмат каго з іх я меў гонар ведаць асабіста. Цяпер узгадваю іхныя аповеды і яны, шмат хто ўжо з таго свету, дадаюць мне веры, упэўненнасці і аптмізму». 

Андрэй Пачобут за кратамі па так званай «польскай справе» з сакавіка 2021 года. Як стала вядома з нядаўняга ліста палітвязня сваёй жонцы, ён пачаў знаёміцца з матэрыяламі сваёй справы. Шэта значыць, што неўзабаве справа будзе перададзеная ў суд.

За артыкул па «распальванні варажнечы» Андрэю Пачобуту паграджае ад 5 да 12 гадоў пазбаўлення волі. 

Чытайце яшчэ:

Віцебскую журналістку Таццяну Мацвееву пакаралі арыштам на 8 сутак

З барысаўскай раёнкі звольнілася галоўная рэдактарка — у эфіры лукашэнкаўскага блогера яна скардзілася на праблемы ў горадзе

Палітзняволеная журналістка Ксенія Луцкіна: «Збіраюся з сіламі для таго, каб ісці далей»