Затрыманы экс-супрацоўнік «Народнай газеты», спартыўны блогер Дзмітрый Сельвеструк

Верагодна, затрыманне здарылася яшчэ напрыканцы мінулага тыдня —  прынамсі апошні запіс у навінавай стужцы, якая да таго абнаўлялася рэгулярна, датаваны 5 траўня. У  той жа дзень у адным з чатаў ён паспеў паведаміць, што да яго з невядомых прычын прыходзіў участковы міліцыянер, але журналіст «нязванаму госцю» не адчыніў дзверы.

Пасля гэтага новай інфармацыі не дадавалася, нягледзячы на чарговы тур нацыянальнага першынства. Падобны форс-мажор здарыўся ўпершыню за апошнія гады. Выглядае, што следам за ўчастковы заявіліся больш настойлівыя візіцёры ў поўнай амуніцыі.    

На канал Дзмітрыя Сельвеструка падпісана амаль дзве тысячы карыстальнікаў. Адрозна ад канкурэнтаў, пляцоўка асвятляе падзеі ў  розных беларускіх футбольных лігах, а не толькі ў «эліце». Гэта дазваляе максімальна ахопліваць аўдыторыю ў рэгіёнах, не прадстаўленых у вышэйшым дывізіёне.  

Дзмітрыю Сельвеструку 33 гады, ён выпускнік факультэта журналістыкі Белдзяржуніверсітэта. Доўгі час працаваў у дзяржаўнай «Народнай газеце», спецыялізаваўся на сацыяльных тэмах ды ІТ-індустрыі.

Паступова пераарыентаваўся на спартыўныя навіны, пачаў супрацоўнічаць са спецыялізаваным рэсурсам Football.by. Роўна тры гады таму запусціў уласны праект «Серебряный век. Футбол Беларуси», які дзякуючы інсайдэрскім крыніцам стаў даволі папулярным у асяродку як заўзятараў, так і спецыялістаў. У адным з аглядаў лепшых інтэрнэт-лакацый пра футбол увайшоў у топ‑5 аўтарскіх тэлеграм-каналаў.     

«Ідэя стварэння канала з’явілася дзесьці ў траўні 2020 года, — расказваў калегам Дзмітрый  Сельвеструк. — Шчыра кажучы, не было магчымасці выказваць усё, што думаю, без абмежаванняў — бальшыня выданняў не хоча праблем ад рэзкіх высноў і ацэнак. Далей з прычыны зразумелых падзей (наступствы каранавірусу, прэзідэнцкія выбары, акцыі пратэсту, — БАЖ) усё адклалася на даўжэйшы тэрмін, але ўрэшце ўсё вырашылася. Якія каналы чытаю сам? Тут дастаткова проста: Улада Татура, Мікалая Іванова, Арсенія Ісаеню, «Вуха», «Заходнюю трыбуну», «Правы Інсайд», «Bub­nOFF LiVE»,  Хіба што Колю Хадасевіча аддаю перавагу менавіта глядзець».

Штодня Дзмітрый Сельвеструк публікуе вялікую колькасць інфармацыі, надаючы ў аднолькавых прапорцыях увагу ўсім лігам, уключна з ніжэйшымі. Яго выказванні па некаторых момантах могуць падацца занадта катэгарычнымі ды задзірлівымі, але гэтая эмацыйнасць якраз і робіць канал адметным ад іншых. Прынамсі падпісантам такая падача падабаецца, усе пасты актыўна каментуюцца.

Пры гэтым аўтар праекта «Серебряный век. Футбол Беларуси» не імкнецца да публічнасці — ні ў назве, ні ў апісанні канала імя Дзмітрыя Сельвеструка не фігуруе.

Чытайце яшчэ:

Journalism is not a crime! Журналісты знялі прыгожы ролік з акцыі БАЖ і ЛСЖ у Вільні

Начинаете карьеру в журналистике? Вам пригодятся эти 9 советов

Чатыры супрацоўнікі гомельскага абласнога радыё апынуліся за кратамі