Журналістку Кацярыну Андрэеву дадалі ў спіс «экстрэмістаў» МУС
24 кастрычніка 2022
Акрамя яе ў спісе з'явіліся запар яшчэ 142 прозвішчы, піша "Вясна".
Большая частка з тых 143 чалавек, якія з’явіліся ў абноўленым спісе МУС — асуджаныя паводле арт. 342 Крымінальнага кодэкса, якія цяпер «адбываюць пакаранне».
Сярод «новых экстрэмістаў» можна пабачыць не толькі журналістку Кацярыну Андрэеву, але і філосафа Уладзіміра Мацкевіча, Зміцера і Насту Дашкевічаў, блогера Уладзіслава Савіна.
Кацярына Андрэева супрацоўнічала з радыё «Свабода», украінскім праектам «Донбас.Реалії», друкавалася ў «Народнай Волі» і расейскім выданні «Новая газета». З сакавіка 2017 года і да свайго арышту ў лістападзе 2020 года працавала на «Белсаце». Двойчы (у 2017 і 2020 гг.) прызнавалася на тэлеканале «Тэлевізійнай асобаю года» і двойчы перамагала ў журналісцкім конкурсе Беларускай асацыяцыі журналістаў «Вольнае слова» (2017 і 2021 гг.)
У суаўтарстве з мужам, журналістам Ігарам Ільяшом Кацярына падрыхтавала шэраг гучных журналісцкіх расследаванняў, а ў 2020 годзе яны выдалі дакументальную кнігу «Беларускі Данбас» пра ролю беларусаў у канфлікце на ўсходзе Украіны. Кніга вытрымала два тыражы.
За стрым, падчас якога паказалі жорсткі разгон акцыі памяці Рамана Бандарэнкі і разбурэнне сілавікамі народнага мемарыялу на плошчы Пераменаў Кацярыну разам з каляжанкай Дар’яй Чульцовай асудзілі на 2 гады пазбаўлення волі ў калоніі агульнага рэжыму.
У 2022 годзе на журналістку завялі новую справу і прызналі вінаватай «у выдачы замежнай дзяржаве, міжнароднай альбо замежнай арганізацыі ці іх прадстаўніку дзяржаўных сакрэтаў Рэспублікі Беларусь». Суддзя Харошка прызначыў ёй восем гадоў калоніі.
Чытайце яшчэ:
Былому прэс-сакратару А1 Мікалаю Брэдзелеву прысудзілі 4 гады калоніі
Расійскі журналіст у эфіры RT заклікаў «тапіць і паліць» украінскіх дзяцей. Яго звольнілі з канала
Фільм пра зняволеных беларускіх журналістак атрымаў срэбра на Чыкагскім кінафестывалі
@bajmedia
