Вярхоўны суд пакінуў у сіле прысуд аўтарам Regnum, асуджаным за распальванне нацыянальнай варожасці

14 чэрвеня Вярхоўны суд вынес рашэнне па апеляцыйнай скарзе Юрыя Паўлаўца, Дзмітрыя Алімкіна і Сяргея Шыпценкі. Скарга засталася без задавальнення, а прысуд — пяць гадоў пазбаўлення волі з адтэрміноўкай на тры гады — у сіле.

— Прысуд пакінуць без зменаў, апеляцыйную скаргу без задавальнення, — зачытаў рашэнне суда старшыня на працэсе суддзя Вярхоўнага суда Уладзімір Давыдаў, перадае Tut.by.

Раніцай у чацвер судовы працэс працягнуўся выступам старшага пракурора аддзела генеральнай пракуратуры Савановіча.

У сваім выступе прадстаўнік пракуратуры назваў віну аўтараў Reg­num цалкам даказанай, крытычна адазваўся пра апеляцыйныя скаргі на прысуд і довады саміх падсудных.

На яго думку, ніякіх сумневаў у вінаватасці Паўлаўца, Алімкіна і Шыпценкі не ўзнікае, а папярэдняе следства і Мінскі гарадскі суд усебакова разглядзелі сабраныя доказы і далі правільную прававую ацэнку.

Прадстаўнік пракуратуры заклікаў судовую калегію Вярхоўнага суда пакінуць рашэнне Мінскага гарадскога суда ў сіле, а апеляцыйныя скаргі аўтараў Reg­num адхіліць.

2 лютага аўтараў расійскага інфармацыйнага сайта Reg­num Юрыя Паўлаўца, Сяргея Шыпценку і Дзмітрыя Алімкіна пакаралі пяццю гадамі пазбаўлення волі з адтэрміноўкай на тры гады за распальванне варожасці на нацыянальнай глебе ў складзе групы асобаў (арт. 130 Крымінальнага кодэкса).

Аўтары Reg­num, якія больш за год правялі за кратамі падчас следства, не згадзіліся з прысудам і падалі апеляцыйныя скаргі. 12 чэрвеня ў судзе выступілі Юрый Паўлавец і Сяргей Шыпценка, а таксама іх адвакаты.

Трэці аўтар Дзмітрый Алімкін у апеляцыйным судзе не ўдзельнічаў.