Мінінфармацыі высвятляе ўладальнікаў сайтаў “Тузін Гітоў” і ucpb.org

Міністэрства інфармуе пра выяўленыя на рэсурсах “парушэнні заканадаўства аб СМІ” і запытвае звесткі пра юрыдычную ці фізічную асобу ўладальнікаў.

Мінінфармацыі таксама падкрэслівае, што можа заблакаваць рэсурс, калі ўладальніку вынесена 2 і больш папярэджанняў, калі ён не выпраўляе выяўленых парушэнняў ці распаўсюджвае забароненую заканадаўствам інфармацыю (п.1 арт. 51 закона  “Аб СМІ”).

Па меркаванні галоўнага рэдактара “Тузін Гітоў”, вядомага музычнага крытыка Сяргея Будкіна, ён не ведае, якія могуць быць падставы для вынясення папярэджання.

– Наш партал працуе ўжо 12 год і за гэты час зрабіў нямала для таго, каб пра беларускую музыку дазналася як мага больш людзей. Мы напісалі тысячы матэрыялаў (праўдзівых, а як жа ж яшчэ!) пра нашых выканаўцаў, прадставілі вялізарную колькасць песень і альбомаў, правялі з сотню канцэртаў, рэалізавалі дзесяткі грамадcка значных праектаў, сярод якіх – «Перазагрузка», «Апошні золак», «Тузін. Немаўля», «Засьпявай.by». Хіба гэта шкодзіць “дзяржаўным і грамадcкім інтарэсам”? Мы вельмі спадзяемся, што выйшла недарэчнасць, якая выправіцца ў хуткім часе, – гаворыць Сяргей Будкін.

У рэдакцыі сайта ucpb.org звязваюць увагу да рэсурса з будучай прэзідэнцкай кампаніяй, удзел у якой плануе ўзяць лідар АГП Анатоль Лябедзька. Намеснік старшыні АГП Васіль Палякоў пракаментаваў сітуацыю наступным чынам: «Лілія Ананіч распачала кампанію по зачыстцы інфармацыйнай прасторы напярэдадні прэзідэнцкай кампаніі. Таму выбар сайта прыхільнікаў АГП цалкам заканамерны. Логіка простая – максімальна абмежаваць магчымасці інтэрнэт-рэсурсаў на свабоду распаўсюду інфармацыі, спасылаючыся на нейкія абстрактныя парушэнні заканадаўства».

На мінулым тыдні аналагічныя лісты з Міністэрства інфармацыі атрымалі рэдакцыі сайтаў freeregion.info і racyja.com.

Нагадаем, што магчымасць вынясення папярэджанняў інтэрнэт-выданням улады атрымалі пасля паспешлівага прыняцця ў снежні мінулага года паправак у закон “Аб СМІ”.