Журналісту Дзянісу Івашыну не дазволілі патэлефанаваць родным
4 сакавіка 2024
Палітзняволенага журналіста з Гродна Дзяніса Івашына ў лютым пазбавілі тэлефоннага званка да родных. Пра гэта паведаміла яго жонка Вольга Івашына ў сацсетках.
«Цуду не адбылося. Такім чынам Дзяніс Івашын у лютым быў пазбаўлены адзінага тэлефоннага званка родным. Высвятляем, чаму так сталася», — напісала Вольга 1 сакавіка.
Звычайна Дзяніс тэлефанаваў жонцы ці маці ў перыяд з 14 да 25 кожнага месяца. Зараз прычыны абмежаванняў сваякам невядомыя. Лісты ад журналіста ў лютым даходзілі.
У лісце ад 26 лютага, паводле Вольгі Івашынай, Дзяніс сцвярджае, што ніякіх зменаў (ані станоўчых, ані адмоўных) з ім не адбылося. Таму складана казаць, чаму ён дагэтуль не тэліў.
Вольга Івашына адзначае таксама, што праблемы з тэлафоннымі званкамі перыядычна ўзнікаюць у іншых установах беларускай пенітэнцыярнай сістэмы.
Журналіста Дзяніса Івашына 12 сакавіка 2021 года затрымалі супрацоўнікі КДБ за ўмяшанне ў дзейнасць міліцыі. 14 верасня 2022 года суддзя Валерый Раманоўскі прызнаў яго вінаватым паводле артыкулу 365 (умяшанне ў дзейнасць супрацоўніка ўнутраных спраў) і частцы 1 артыкула 356 Крымінальнага кодэкса (здрада дзяржаве) і асудзіў да 13 гадоў і 1 месяца калоніі ва ўмовах узмоцненага рэжыму.
Зараз Дзяніс Івашын утрымліваецца ў следчай турме Жодзіна ва ўмовах строгага рэжыму.
@bajmedia
