Журналісту «Новага Часу» Алесю Кіркевічу разбілі галаву ў Курапатах падчас начнога налёту

Каля 15 людзей у чорным з закрытымі шалікамі і балаклавамі тварамі з’явіліся з‑за рогу будаўнічага плоту ды з крыкамі “Белая раса!” і “Славяне!” накінуліся на валанцёраў. У руках некаторых нападнікаў былі драўляныя кіі. Пасля кароткай сутычкі нападнікі зніклі ў лесе, прайшоўшы праз танэль пад МКАДам.

Увечары колькасць людзей у лагеры сягала 25-ці. Падчас нападу а 4‑й ранку на вахце знаходзіліся Павел Вінаградаў, Зміцер Крэменецкі, Арцём Леўчанка, Андрэй Мельнікаў і іншыя — агулам каля 10 чалавек. Сур’ёзных траўмаў у актывістаў няма, журналісту Алесю Кіркевічу НЧ драўляным кіем рассеклі галаву.

Пасля нападу актывіст Юры Лукашэвіч выклікаў міліцыю, на месца падцягнуліся журналісты “Белсату” ды “Радыё Свабоды”. Прыехаў Зміцер Дашкевіч, Аляксей Янукевіч, Эдуард Пальчыс.

Актывісты лічаць, што напад быў узгоднены з супрацоўнікамі міліцыі, бо міліцыянты ў штацкім, якія дэжурылі каля будоўлі, за пару гадзін да падзеі зніклі са свайго звыклага паста.

Затое а 8‑й гадзіне яны з’явіліся ў аддзяленні міліцыі, дзе запісваліся паказанні пацярпелых актывістаў.