Здымачная група партугальскага тэлеканала трапіла ў Харкаве пад абстрэл

Партугальскія журналісты ехалі ў камандзіроўку ў Данецкую вобласць на лінію фронту. Па дарозе з Кіева яны спыніліся ў Харкаве. Сёння яны збіраліся накіравацца ў вёску Граза, дзе ўчора ад расейскай ракеты загінула 52 мясцовых жыхара, але самі трапілі пад расійскі абстрэл.

— Ракета ледзь не заляцела ў гатэль, — пракаментаваў НСЖУ украінскі прадзюсер партугальскай здымачнай групы Андрэй Каваленка, які з’яўляецца выканаўчым дырэктарам Акадэміі ўкраінскай прэсы. Гэтая арганізацыя пастаянна дапамагае міжнародным СМІ працаваць ва Украіне.

Як сцвярджаюць украінскія калегі, дадзены гатэль карыстаецца вялікай папулярнасцю сярод журналістаў, прадстаўнікоў розных міжнародных арганізацый, якія прыязджаюць у Харкаў у камандзіроўкі.

— Прыціснула аконнай рамай, але я ў бяспецы. Мы ўсе ў бяспецы, але я думаў, што гэта ўсё… — дадаў спадар Каваленка.

У НСЖУ зазначаюць, што расейскія ракетныя абстрэлы гатэляў і аб’ектаў грамадскага харчавання, якімі карыстаюцца журналісты ў камандзіроўках (гатэлі ў Харкаве і Запарожжы, піцэрыя ў Краматорску), з’яўляюцца мэтанакіраванай тактыкай акупантаў, накіраванай на запалохванне журналістаў і прадстаўнікоў грамадзянскага сектару.

Чытайце яшчэ:

Як працуе офіс «Белсата» ў Кіеве? БАЖ на Хрэшчатыку. ВІДЭА

«Святкаваць штосьці разам — гэта дужа істотна». Як выжываюць рэдакцыі ў розных краінах

«Незалежныя медыя перажываюць крах бізнэс-мадэлі, а грамадства падвяргае сябе самацэнзуры». Асноўнае са справаздачы Freedom House