Апеляцыйную скаргу журналіста Аляксандра Зянкова Вярхоўны суд будзе разглядаць 16 красавіка

Разгляд апеляцыйнай скаргі журналіста Аляксандра Зянкова ў Вярхоўным судзе распачнецца 16 красавіка ў 9.30 раніцы. На працэс прызначаная суддзя ВС Таццяна Васілевіч. Барысаўскі фатограф і відэааператар-фрылансер аспрэчвае прысуд да пазбаўлення волі, вынесены яму Мінскім гарадскім судом.

Аляксандр Зянкоў. Фота: LinkedIn

30 студзеня 2024 года суддзя Мінскага гарадского суда Жанна Брысіна прызнала Аляксандра Зянкова вінаватым ва ўдзеле ў экстрэмісцкім фарміраванні (частка 3 артыкула 361–1 Крымінальнага кодэкса) і прысудзіла яму тры гады пазбаўлення волі з адбыццём у папраўчай калоніі ва ўмовах агульнага рэжыму.

Журналіста затрымалі 22 чэрвеня 2023 года ў яго доме ў Барысаве. Сілавікі зладзілі ў жыллі ператрус і забралі камп’ютарную тэхніку. Пасля гэтага Зянкова адразу павезлі ў Мінск і 10 дзён трымалі ў ізалятары часовага ўтрымання на вуліцы Акрэсціна. Паводле аднаго з ягоных сукамернікаў па ІЧУ, Аляксандр быў спакойны, распавядаў, што свае віны ні ў чым не прызнае і што ён адмовіўся ад паслугаў дзяржаўнага адваката. Прыблізна на пяты-шосты дзень знаходжання на Акрэсціна  яго забралі на допыт да следчага, і вярнуўся ён толькі праз пяць гадзін. Распавёў, што яму інкрымінуюць крымінальны артыкул за спрыянне дзейнасці экстрэмісцкага фарміравання, і  абвінавачанне тычыцца ягоных відэаздымкаў, паказаных на «экстрэмісцкім» інтэрнэт-рэсурсе. Доказы гэтага нібыта знайшлі ў тэхнічным абсталяванні, якое забралі з дома.

Праз 10 дзён Зянкова перавялі ў следчы ізалятар № 1 на вуліцы Валадарскага ў Мінску. Там ён знаходзіўся да суда і яшчэ некаторы час пасля. Зараз барысаўскага фатографа ўтрымліваюць у СІЗА пры магілёўскай турме № 4.  

23 студзеня 2024 года беларуская праваабарончая супольнасць прызнала яго палітычным вязнем.

Аляксандра Зянкова ў родным Барысаве ведаюць як прадпрымальніка-фатографа, які рабіў здымкі на замову розных прадпрыемстваў і арганізацый. Таксама ён супрацоўнічаў з мясцовымі незалежнымі выданнямі ў якасці фрылансера. Потым Аляксандр захапіўся відэаздымкамі, рабіў у тым ліку і дакументальныя стужкі, якія атрымлівалі ўзнагароды на фестывалях хрысціянскіх фільмаў і тэлепраграм «Магніфікат». У прыватнасці, у 2015 годзе журы фестывалю адзначыла яго творчую працу пра адбудаванне царквы ў вёсцы Зэмбін.

Некалькі разоў Аляксандра Зянкова падчас фота- і відэаздымак затрымлівала міліцыя, але да адміністрацыйнага, тым больш крымінальнага пераследу не даходзіла. Прыкладам, у ліпені 2020 года ён быў у ліку 47 журналістаў і фатографаў, якіх затрымалі ў Мінску, тады яго адпусцілі пасля праверкі дакументаў. У верасні 2020 года да барысаўскага фатографа прыходзіла міліцыя, каб папярэдзіць пра недапушчальнасць парушэння заканадаўства.