Яўгена Перліна зноў атакуюць праўладныя журналісты — на гэты раз пасля паста ў Instagram

Пост Яўгена Перліна ў Insta­gram з’явіўся дзень таму — верагодна, як адказ на хвалю хейта, якая абрынулася на былога тэлевядучага пасля рэкламы «Мілы». У допісе Перлін узгадвае сваю працу на ТБ і  кажа, што нікому не здраджваў і любіць сваю краіну і Мінск.

«Гэта горад, які даў мне ўсё, і я аддаў яму, што мог. Столькі праектаў мы запусцілі, столькі прыгажосці паказалі ў вячэрнім шоу на ТБ, у рамках Еўрабачання і розных спартыўных турніраў… Тут так шмат таленавітых маладых людзей — са свету творчасці і наогул розных прафесій. Я іх запрашаў у свае тэлепраекты і па гэты дзень паказваю ў сваіх сацсетках. У іх — энергія, крэатыў і тая самая іскра, якая стварае», — піша Перлін.

Ён дадае, што хоча «толькі лепшага для свайго дома, сямʼі і краіны». 

«Так было заўсёды, не спрабуйце падмяніць паняцці — нікому я не здраджваў. Заўсёды верыў у нашых людзей. Мы з усім справімся! Галоўнае, не быць абыякавым. Беларусь — Наш дом. І іншага ў нас няма».

У адказ на гэты допіс тэлаграм-канал ATN_NEWS апублікаваў пост, у якім сцвярджае, што праца Перліна на тэлебачанні была нібыта нічога не вартай. 

У якасці прыклада прыводзяць шоў «Макаёнка, 9» — нібыта яно стала адным з найбольш правальных праектаў канала «Беларусь 1»: «сярэдняя доля — у раёне 2–2,5% пры цяперашняй долі тэлеканала 8–9%». Сцвярджаецца, што праграму ўжо збіраліся закрываць.

У супрацьлегласць шоў Перліна ставяць праект «Фактор.ВУ», які, паводле аўтараў паста, «меў сярэднюю долю аднаго эфіру ў трэцім сезоне ў раёне 21–22%. Самы рэйтынгавы эфір — у раёне 28%. На піку тэлеглядзення — больш за 40%».

Як заўважыла «Наша Ніва», зараз статыстыка праглядаў значна ніжэйшая. Па дадзеных апошняга тэлевымярэння, у топе праграм быў толькі адзін з выпускаў «Фактор.ВУ» з рэйтынгам 4,81%.

Акрамя таго, былыя калегі Перліна выдвігаюць прэтэнзію, што ён «да стварэння «Еўрабачання» ніколі не меў ніякага дачынення. Да вядзення —так. Але яно не мае ніякага дачынення да стварэння».

Чытайце яшчэ:

Сергей Дорофеев: я — беженец

«Шмат людзей накінуліся на мяне, як на лёгкую нажыву». Былая фатографка БелТА адказала на хвалю хейта ў свой адрас

Вядучая АНТ Наталля Немагай: Мне да дзвярэй прыносілі пахавальныя вянкі