Яўгена Меркіса, якога нядаўна этапавалі ў Шклоўскую калонію, будуць зноў судзіць

На сайце Гомельскага абласнога суду з’явілася паведамленне пра закрытае судзебнае паседжанне над Яўгенам Меркісам. Яно распачнецца ў чацвер 28 верасня а 9.15. Суддзёй на гэтае слуханне прызначаны Аляксей Хлышчанкоў. Менавіта ён прызначыў спадару Меркісу атыры гады пазбаўлення волі ў калоніі ва ўмовах узмоцненага рэжыму. Журналіста прызналі вінаватым на падставе ч. 1 і ч. 2 артыкула 361–4 КК («Садзейнічанне экстрэмісцкай дзейнасці»), а таксама паводле ч. 3 артыкула 361–1 КК («Удзел у экстрэмісцкім фармаванні»).

Суд вёўся ў закрытым рэжыме. З адваката ўзятая падпіска пра невыдаванне. Адкрытым зрабілі толькі агалошванне рэзалюцыйнай часткі выраку.

Дакладна невядома, што менавіта паставілі ў віну Яўгену. Паводле  праваабаронцаў і сяброў, «экстрэмізм» журналіста і краязнаўцы Меркіса звязаны хіба што з перадачай фотаінфармацыі рэсурсам, аднесеным да «эстрэмісцкіх», наконт знаходжання і перасоўвання ў рэгіёне расійскай вайсковай тэхнікі. Такіх абвінавачваняў і судоў у Гомелі было нямала.

Мясцовая дзяржаўная газета ў дзень вынясення прысуду пісала, што «36-гадовы гамяльчук Яўген Меркіс працаваў на тэлеканал «Белсат»… Апроч таго, Меркіс накіроўваў у экстрэмісцкія тэлеграм-каналы фотаздымкі ваеннай тэхнікі і паведамляў пра яе перамяшчэнне. Ён прыцягваўся да адміністрацыйнай адказнасці за ўдзел у несанкцыянаваных масавых мерапрыемствах у 2020 годзе».

З выракам Гомельскага абласнога суда Яўген не пагадзіўся — падаваў апеляцыйную скаргу ў Вярхоўны суд. 29 жніўня суддзя Вярхоўнага суда Уладзімір Чаравач скаргу Меркіса адхіліў, вырашыў, што пакаранне журналісту вынесена справядлівае і няма падставаў яго пераглядаць.

Сілавікі затрымалі Яўгена Меркіса 13 верасня 2022 года. У яго зрабілі ператрус па месцы жыхарства з выняткам носьбітаў інфармацыі. Вобшукі былі праведзеныя ў кватэры бацькі журналіста, а таксама ў сяброў.

Журналісцкую дзейнасць Яўген Меркіс пакінуў яшчэ да арышту з тае прычыны, што шэраг незалежных СМІ, з якімі супрацоўнічаў, улады аднеслі да «экстрэмісцкіх фармаванняў».

Чытайце яшчэ:

«Жыццё — падарожжа, а мы ўвесь час кудысьці крочым». Беларускі журналіст з’ехаў у ЗША і вядзе YouTube-канал пра дыяспару

«Упершыню купіў у турэмнай краме марскую капусту». Што новага ў палітзьняволенага журналіста Дзяніса Івашына

Міжнародны турнір па футболе сярод журналістаў у Друскінінкаі. ФОТА