«Яны прыехалі зь ператрусам, але спужаліся журналістаў і зьехалі», — маці затрыманай журналісткі Каравянковай
8 жніўня 2018
Валянціна Пятроўна, маці журналісткі БелаПАН Тацяны Каравянковай, распавяла Свабодзе падрабязнасьці затрыманьня дачкі і ператрусу. Журналістка была затрыманая 7 жніўня ў сябе на лецішчы ў вёсцы Жодзішкі (Горадзенская вобласьць). Там жа прайшоў ператрус.
«А 7‑й ранку мы пачулі моцны грукат на вуліцы. Аказалася, гэта сьледчыя адамкнулі замкнутую брамку. Пасьля толькі пагрукалі ў дзьверы», — распавядае Валянціна Пятроўна.
«Таня адчыніла дзьверы, нам паказалі дакумэнты на ператрус. Забралі тэлефоны — мой і Танін, ноўтбук, флэшку, дыктафон. Абглядзелі машыну.
Пастанова пра затрыманьне Тацяны Каравенковай
Пасьля павезьлі ў Менск. Таню пакінулі ў Сьледчым камітэце, а мяне — на вобшук у кватэру. Пад’ехалі да пад’езду, а тут журналісты. Супрацоўнікі Сьледчага камітэту пастаялі, пасьля сталі перамаўляцца: „нашы пад’едуць і адцясьняць іх“. Празь некалькі хвілін нехта ператэлефанаваў і мы паехалі назад у Сьледчы камітэт».
Выйсьці з машыны Валянціне Каравянковай не дазволілі.
У Сьледчым камітэце яна знаходзілася з 15 гадзінаў да 21.00, пакуль вырашалі, што рабіць далей зь ператрусам.
«Першы сьледчы, які займаўся Танінай справай, роўна а 18 гадзіне сышоў і сказаў пачакаць яго калегу, — кажа Валянціна Пятроўна. — Пасьля прыйшоў другі. Можа яму лянота была ехаць, можа ўжо позна было, але яны доўга раіліся, а пасьля выклікалі таксоўку і сказалі, што прыедуць заўтра забіраць цьвёрды дыск ад кампутара. А Таню ў сераду прывязуць на паўторны допыт, бо яна адмовілася размаўляць без адваката».
Увесь гэты час, як кажа Валянціна Пятроўна, у яе не было магчымасьці ні папіць вады, не перакусіць: «Нават памыцца не далі».
@bajmedia
