Як адправіць пасылку палітвязьням з‑за мяжы? Тлумачаць праваабаронцы

Сёньня, калі палітзьняволеным блякуюць ліставаньне, надзейным спосабам іх падтрымкі зьяўляюцца пасылкі, паведамляюць праваабаронцы «Вясны».

На фоне надыходзячых сьвятаў «Вясна» тлумачыць, як і каму з палітвязьняў можна паслаць пасылкі з‑за мяжы.

Каму можна слаць пасылкі

• Палітзьняволеныя, суд над якімі яшчэ не адбыўся і прысуд не набыў моц, маюць права атрымліваць бандэролі і пасылкі ў неабмежаваных колькасьцях. Пасылку такім вязьням можа даслаць любы чалавек, у тым ліку з‑за мяжы.

• Знайсьці і выбраць палітвязьня, пачытаць падрабязную інфармацыю можна на сайце «Вясны» — prisoners.spring96.org.

• Палітвязьням, якія ўтрымліваюцца ў СІЗА‑6 і СІЗА‑7, пасылкі лепш ня слаць, бо там яны залічваюцца ў 30-кіляграмовы ліміт на месяц.

Што вы можаце пакласьці ў пасылку

• зэфір, цукеркі, мармэляд, пасьцілу, халву, шакаляд;

• бульбу хуткага прыгатаваньня, макарону хуткага прыгатаваньня, суп хуткага прыгатаваньня, шматкі (грачаныя, аўсяныя);

• вяленае мяса, каўбасу (сыравяленую, сыравэнджаную),

• сыр

• каву любую, гарбату ліставую;

• арэхі, курагу, фінікі, цукаты;

• печыва, сухары;

• цёплыя шкарпэткі;

• канвэрты, аркушы паперы, паштоўкі, сшыткі;

• каляровыя алоўкі, флямастэры, шарыкавыя асадкі (чырвоныя забароненыя).

Што дакладна нельга слаць

• чарнасьліў, разынкі, сланечнікавыя семкі, казінакі;

• шматразовыя станкі для галеньня;

• бясьпечныя нажніцы;

• шалік;

• вільготныя сурвэткі, ватныя палачкі;

• запальніцы;

• плястыкавы посуд;

• памэлу і грэйпфруты;

• пэкінскую капусту;

• соль;

• кнігі, часопісы, крыжаванкі, сканворды;

• акварэль.

Якія абмежаваньні для пасылак з‑за мяжы?

Да 1 красавіка 2023 года норма адной пасылкі з‑за мяжы складае 31 кіляграм, а кошт усяго, што перасылаецца павінен быць ня болей за 1000 эўра. Мы раім рабіць невялікія пасылкі да 30–40 эўра. На пошце вас папросяць запоўніць форму і пералічыць, што вы шляце і колькі гэта каштуе. Майце на ўвазе, што пасылка можа ісьці каля 5–6 тыдняў.

Як спакаваць пасылку?

З усяго, што вы купілі ў пасылку, трэба зьняць фабрычную ўпакоўку, зрэзаць цэтлікі, а прадукты харчаваньня перакласьці ў празрыстыя пакеты. Інструкцыю па прыгатаваньні і назву прадукту можна выразаць і пакласьці ў пакет. Па магчымасьці напішыце пералік усяго ўкладзенага ў пасылку на аркушы паперы на расейскай ці беларускай мове.

На пошце вы можаце выбраць каробку з памеру, які вам падыходзіць, ці выкарыстоўваць сваю. Не забудзьце напісаць усе дадзеныя палітвязьня, уключаючы імя па бацьку і адрас утрыманьня. Звычайна пасылку можна адсочваць па штрыхкодзе, які выдаюць на пошце. Так вы даведаецеся, што яна не згубілася і трапіла да вязьня.

«Уявіце неймаверную ўдзячнасьць і радасьць чалавека, які атрымае вашу пасылку. Гэта знак таго, што пра яе ці яго не забылі, знак падтрымкі і веры ў вольную Беларусь», — адзначаюць правабаронцы.

Коллеги в тюрьмах. Напишите им письмо поддержки АКТУАЛЬНЫЕ АДРЕСА