The Washington Post заклікала ЗША і Эўразьвяз дапамагчы Беларусі ў выпадку магчымага разрыву з Расеяй

У публікацыі сьцьвярджаецца, што Пуцін цягам дваццаці гадоў марна спрабаваў усталяваць кантроль над постсавецкімі краінамі пры дапамозе ціску, фальсыфікацыяў, прапаганды, кібэрвойнаў і вайсковага ўмяшаньня, як у выпадках Украіны і Грузіі. І цяпер Пуцін спрабуе змусіць Лукашэнку выканаць саюзнае пагадненьне дваццацігадовай даўніны, якое «ператварае Беларусь у правінцыю», а Лукашэнка пры гэтым супраціўляецца і кажа, што ня хоча быць «апошнім прэзыдэнтам Беларусі».

«І хоць Лукашэнку нельга назваць прывабным для Захаду партнэрам, але яго спробы захаваць ягоную краіну заслугоўваюць падтрымкі», — піша The Wash­ing­ton Post.

Аўтары публікацыі лічаць, што, нягледзячы на Лукашэнкава шматгадовае балянсаваньне паміж Захадам і Пуціным, на фальсыфікацыі выбараў і брутальнае задушэньне пратэстаў, цяперашні ціск Пуціна можа зьмяніць палітыку Лукашэнкі:

«Расейскі лідэр спыніў пастаўкі субсыдыяванай нафты, вельмі важнай для беларускай эканомікі, і запатрабаваў выканаць замарожаную „саюзную дамову“, — піша выданьне. — Падчас сустрэчы ў пятніцу спадар Пуцін чарговы раз адмовіў Лукашэнку ў зьніжках на нафту і газ. Калі гэтая пазыцыя ня зьменіцца, беларуская эканоміка можа сур’ёзна пацярпець: пятую частку яе экспарту складаюць перапрацаваныя прадукты таннай расейскай нафты».

«Спадар Лукашэнка зрабіў выгляд, нібыта ён супрацьстаіць расейскаму ціску, купіўшы танкер нафты з Нарвэгіі. А дзяржаўны сакратар Майк Пампэо зрабіў выгляд, нібыта дапамагае яму, наведаўшы Менск 1 лютага, — гаворыцца ў матэрыяле. — Пампэо абяцаў, што адміністрацыя Трампа прызначыць новага амбасадара ў Беларусі, і запэўніў Лукашэнку: «Нашы вытворцы энэргіі гатовыя паставіць 100% нафты, якая вам патрэбная, за канкурэнтную цану».

Выданьне адзначае, што пастаўкі нафты з ЗША наўрад ці выратуюць беларускія перапрацоўчыя заводы.

«Наадварот, спадару Лукашэнку трэба будзе выбіраць: або здацца Пуціну, або прынамсі зрабіць крокі ў кірунку шокавай тэрапіі для эканомікі, што дазволіць выслабаніць яе з‑пад расейскай залежнасьці. І калі ён выбера апошні сцэнар, Злучаныя Штаты і Эўразьвяз павінны зрабіць усё магчымае, каб аблегчыць боль, пры гэтым не спыняючы патрабаваць паляпшэньня сытуацыі з правамі чалавека».

Артыкул апублікаваны ўдзень 11 лютага у разьдзеле «Меркаваньні» і падпісаны рэдакцыйнаю радаю The Wash­ing­ton Post.