Вярхоўны суд пакінуў у сіле вырак Алесю Марчанку, асуджанаму па абвінавачанні ў супрацы з «Белсатам»

Вярхоўны суд 4 чэрвеня разгледзеў апеляцыйную скаргу асуджанага да зняволення Алеся Марчанкі. Суддзя Вярхоўнага суда Аляксей Хлышчанкоў пакінуў вырак у сіле, а скаргу без задавальнення.

Відэааператар Алесь Марчанка. Фота: з асабістай старонкі ў Face­book

Крымінальная справа паводле часткі 3 артыкула 361–1 Крымінальнага кодэкса (удзел у экстрэмісцкім фарміраванні) разглядалася ў Мінскім гарадскім судзе. Судовы працэс ў дачыненні былога супрацоўніка тэлеканала «Белсат» Алеся Марчанкі распачаўся 25 сакавіка 2024 года.

Праз тыдзень, 2 красавіка, суддзя Святлана Макарэвіч агучыла абвінаваўчы вердыкт: тры гады пазбаўлення волі з адбыццём у калоніі агульнага рэжыму.

Алесь (Аляксандр) Марчанка быў затрыманы супрацоўнікамі міліцыі 19 кастрычніка 2023 года. Пасля затрымання ён адбыў два адміністрацыйныя артышты па 15 сутак. Праваабаронцам вядома, што другі з іх быў прызначаны 3 лістапада судом Цэнтральнага раёна Мінска. Тады суддзя Юлляна Шчэрба прызнала 63-гадовага Марчанку вінаватым у распаўсюдзе экстрэмісцкіх матэрыялаў (паводле часткі 2 артыкула 19.11 КаАП). Пакуль мужчына знаходзіўся пад арыштам, сілавікі знайшлі падставы для крымінальнага пераследу.

28 сакавіка 2024 года беларуская праваабарончая супольнасць прызнала Алеся Марчанку палітычным вязнем.

Пасля вынясення прысуду яшчэ да разгляду апеляцыйнай скаргі Вярхоўным судом мужчыну перавялі з мінскага следчага ізалятара ў Магілёў — у СІЗА пры турме № 4. 

Вядома, што яшчэ ў лістападзе 2018 года Алесем Марчанкам цікавіліся, меркавана, супрацоўнікі КДБ. Спачатку яму тэлефанавалі і запрашалі «паразмаўляць». У адказ на просьбу даслаць афіцыйную позву прагучала пагроза: «Не хотите по-хорошему — будет по-плохому». У той самы дзень людзі ў цывільным прыязжалі дадому да Марчанкі, але яго не заспелі. Праз жонку яны зноў перадалі запрашэнне на «размову», але ніякай позвы не пакінулі.