Выкладчыкі журналістыкі павінныя самі працаваць у СМІ, — мяркуе шведскі медыяэксперт

У навучанні журналістыцы практыка з’яўляецца асновай авалодвання
прафесіяй. Вось чаму, сышоўшы з рэдакцыі нават на непрацяглы час,
журналісту часам бывае складана сачыць за зменамі, якія адбываюцца ў
сучасных масмедыя.

Пакуль у Беларусі думаюць, як эфектыўней
рыхтаваць будучых праваднікоў дзяржаўнай ідэалогіі, у Швецыі разважаюць
пра кардынальныя змены ў мясцовай мадэлі адукацыі журналістаў. Чым жа
сённяшняя мадэль не адпавядае патрабаванням часу? Пра гэта беларускім
журналістам — удзельнікам трэнінгу ў шведскім інстытуце FOJO — распавёў
былы выкладчык журналістыкі, прафесар Стакгольмскага ўніверсітэта, фрыланс-журналіст Марк Камерфорд.

На думку
спадара Камерфорда, сённяшняя сітуацыя, калі толькі сам журналіст ці
рэдакцыя вырашаюць, што яны будуць распавядаць сваім чытачам, ужо
не задавальняе аўдыторыю.

«Мы занадта доўга размаўлялі
з чытачом „звысок“. Наша аўдыторыя ўжо стамілася ад таго, што
журналісты лічаць сабе „голасам народу“», — заўважае Марк Камерфорд.

Ускосна гэтую думку вядомага ў Швецыі журналіста пацвяржаюць наклады шведскіх газет, якія ў апошнія годы змяншаюцца.

«Людзі перастаюць купляць газеты, і гэта азначае, што надышоў час зменаў», — упэўнены спадар Камерфорд.

Падмурак
для зменаў — стварэнне пляцоўкі для размовы з людзьмі. Размова, дыялог
з чытачамі — гэта тое, што і раней рабілі медыя, але зараз гэтая
размова павінна перайсці на якасна новы ўзровень. Сённяшні чытач медыя,
асабліва веб-медыя, можа аператыўна ўплываць на якасць
журналісцкіх артыкулаў, на іх тэматыку, можа ацэньваць працу рэдакцыі,
і з яго меркаваннем могуць пазнаёміцца людзі ва ўсім свеце.

Марк Камерфорд

Сёння
журналісты ўжо не могуць быць спецыялістамі толькі ў адной галіне.
Ад іх, як ніколі раней, патрабуецца ўменне ісці ў нагу з часам і новымі
тэхналогіямі. «Не разумею, як можна прапаноўваць студэнтам нейкую
спецыялізацыю? Мы ж бачым, як аб’ядноўваюцца сродкі масавай
інфармацыі!» — дзівіцца Марк Камерфорд.

На думку
спадара Камерфорда, выкладчыкі журналістыкі ў вышэйшых навучальных
установах Швецыі даволі мала ведаюць пра сучасныя тэхналогіі, пра тыя
змены, якія адбываюцца ў звязку з імі ў рэдакцыях друкаваных і онлайн-медыя.

«Я лічу,
што выкладчыкі, якія больш за 10 гадоў не працавалі ў журналістыцы,
не павінныя выкладаць, бо яны адарваныя ад жыцця», — лічыць шведскі
медыяэксперт.

Год таму спадар Камерфорд агучыў свае думкі
ва ўніверсітэце, дзе працаваў. Ён прапанаваў, каб кожны выкладчык
штогод як мінімум тры месяцы працаваў ў рэальнай рэдакцыі. Зразумела,
такі падыход не спадабаўся большасці тых, хто сёння вучыць будучых
шведскіх журналістаў. Зменаў так і не адбылося. Але яны, безумоўна,
прыйдуць, бо ад будучыні і прагрэсу яшчэ ніхто не ўцякаў, — перакананы
Марк Камерфорд.