Рак, рэмісія і жаночыя мары: выйшаў фільм пра барацьбу вядомых беларускіх журналістак з анкалогіяй

Журналісткі Кацярына Ваданосава і Кацярына Пытлева ў эміграцыі сутыкнуліся з дыягназам «рак малочнай залозы».  У фільме «Каця і Каця. Рак, рэмісія і жаночыя мары», які выйшаў на YouTube-канале  «Цёця Іра», маладыя жанчыны распавядаюць, як змянілася іх жыццё пасля анкалагічных аперацый. 

Вокладка фільма «Каця і Каця. Рак, рэмісія і жаночыя мары»

Рак грудзей — захворванне нярэдкае. На яго ў ХХІ стагоддзі пакутуюць каля 10% жанчын ва ўсім свеце. Беларускія журналісткі Кацярына Ваданосава і Кацярына Пытлева сутыкнуліся з хваробай у самы складаны час — у эміграцыі.

Пачатак іх гісторый запісала яшчэ ў 2022 годзе гарадзенская журналістка Ірына Новік. Яны склаліся ў праект «Пра рак. Гісторыі беларусак».

В Вильнюсе открылась фотовыставка «Про рак: истории белорусок». В кадре — журналистки

Працягам той ініцыятывы стаў фільм «Каця і Каця. Рак, рэмісія і жаночыя мары». У стужцы гераіні расказваюць пра тое, як змянілася жыццё пасля аперацыі. Гэта не заўсёды лёгка, не зусім прыемна і не вельмі звыкла.

У гэтым жыцці ёсць злосць, абмежаванні і адчуванні ўласнай канечнасці. А яшчэ — яркія эмоцый і новыя магчымасці, ёсць глыбокія перажыванні і чыстыя мары.

«Для мяне гісторыі Каці і Каці — не пра хваробу, — расказала Hrodna.life аўтарка фільма Ірына Новік. — Яна — толькі нагода больш уважліва паглядзець на людзей. На тое, як жанчыны шукаюць новыя спосабы жыць, нанова ўсведамляць сябе і свет, знаходзяць новыя сэнсы існавання. Гэты фільм пра тое, што з аднаго боку — жыццё пасля раку ўжо ніколі не будзе ранейшым. А з іншага — што яно такі насамрэч ёсць. Самае сапраўднае. Можа нават з больш шырокім дыяпазонам пачуццяў і эмоцый, з большым усведамленнем каштоўнасці кожнай жыццёвай дробязі, з яснейшым бачаннем сябе і свету навокал».