«Вы не СМІ». Памочніца старшыні суда не пускала журналіста-фрылансера на абвяшчэнне прысуду

Хвілін за сем да прызначанага часу маладая памочніца старшыні суда Таццяна Волкава запрасіла абвінавачанага музыку, а таксама прадстаўнікоў СМІ і проста гледачоў ў залу пасяджэнняў. Памкнуўся ў залу з фотаапаратам на трынозе і журналіст-фрылансер, сябра ГА «БАЖ» Яўген Меркіс. Аднак на ўваходзе яго перастрэла Волкава. Меркіс здзівіўся: «Чаму? Вунь афіцыйны відэааператар ужо здымае абвінавачанага і прысутных».

«Вы не СМІ», — коратка адказала фрылансеру Волкава.

Калі на сітуацыю адрэагавалі праваабаронцы, памочніца адступіла.

«Яна стала ў дзвярах і нават спрабавала адпіхваць мяне, кажучы: «Вы не СМІ». Ніякіх дакументаў глядзець ці правяраць не збіралася — суд быў адкрытым. Бачу ў гэтым непаразуменні працяг дзяржаўнай палітыкі, што назіраецца ў судах, сілавых структурах ды іншых ведамствах: дзяленне грамадства на «правільных» і няправільных», а журналістаў — на «чэсных» і «нячэсных», — сказаў Яўген Меркіс у гутарцы з карэспандэнтам службы маніторынгу ГА «БАЖ».

Прадстаўнік Беларускага Хельсінкскага камітэта ў рэгіёне Віктар Адзіночанка зазначыў, што ён шакаваны не толькі прысудам (франтмена музычнага гурта пакаралі трыма гадамі «хіміі»), але і стаўленнем памочніцы старшыні суда да галоснасці падчас ажыццяўлення правасуддзя.

«Пераконваюся, што пры разглядзе палітычных спраў і судам бывае «не да законаў», — кажа праваабаронца Адзіночанка.