Урокі натыўнай рэкламы

Чым натыўная рэклама адрозніваецца ад іншай?

“Натыўны” — ад англійскага “native”, што значыць натуральны. Інакш такі від рэкламы называюць “бясшумная”.

“Гэта назва дапамагае зразумець асноўнае адрозненне ад звычайных рэкламных артыкулаў. Гэта артыкулы, за якія плаціць кліент, але дэ-факта мы, рэдакцыя, робім матэрыял для сябе. Чытач не адрознівае тэкст натыўнай рэкламы ад астатніх публікацый”, — тлумачыць рэдактар “CityDog.by” Сяргей Сахараў.

Ягоная калега Яся Каралевіч-Картэль дадае, што нягледзячы на гэта, натыўная рэклама абавязкова пазначаецца ў адпаведнасці з заканадаўствам аб рэкламе.

То бок натыўная рэклама фактычна на 100 % упісваецца ў канцэпцыю, каштоўнасці, стылістыку і інтарэсы мэтавай аўдыторыі канкрэтнага выдання. Адпаведна не кожны рэкламадаўца са сваім брэндам, праектам, прадуктам ці паслугай нават за грошы можа стаць “героем раману” менавіта вашага СМІ. У “CityDog.by” былі выпадкі, калі кліентам адмаўлялі ў натыўнай рэкламе з этычных меркаванняў.

Кліент, варты натыўнай рэкламы

“Наша задача — захапіць якасна новую аўдыторыю. Яна ўжо нарадзілася ў Мінску, мы гэтаму пасадзейнічалі. Эканамічны і дэмаграфічны партрэт нашай публікі выгодны для рэкламадаўцаў. Апошнія гэта добра разумеюць”, — Сяргей Сахараў патлумачыў, чаму да іх звяртаюцца рэкламныя агенцыі.

Паводле рэдактара “CityDog.by”, такая тэндэнцыя — з’яўленне якасна новай аўдыторыі са сваімі запытамі — без сумневаў чакае і беларускія рэгіёны.

“Мы зараз прайшліся па Гродна. Кідаецца ў вочы колькасць кавярняў, што з’яўляюцца. Запыты крэатыўнага класа: паболей кавярняў, цікавых прастор, веладарожак, —усе гэтыя рэчы кажуць пра тое, што змены адбываюцца”, — гаворыць Сяргей Сахараў.

Адпаведна гэтаму варта шукаць кліентаў і рэкламадацаў, з якімі можна зрабіць цікавыя натыўныя праекты, якія будуць успівацца ў канцэпцыі СМІ.

У якасці ўдалых натыўных праектаў “CityDog.by” выступоўцы адзначылі “Мінскфан”  і “Адметныя”.

Перспектывы натыўнай рэкламы

У гэтай тэмы шмат праціўнікаў.

“У гэтым сезоне адна з серый “South Park” была прысвечаная натыўнай рэкламе, дакладней таму, у шо яна пераўтварыла ў Амерыцы. Мяне гэта прымусіла задумацца: ці не скоціцца гэта ўсё да таго, што любая інфармацыя будзе дэ-факта чыёйсьці рэкламай? У Беларусі гэтага пакуль няма. Напэўна, тут я пахваліў бы за гэта нашыя заканадаўчыя органы. На мой погляд, яны рэгулююць рынак дастаткова пісьменна, прынамсі, не шкодзяць яму”.

Колькі адсоткаў ад продажу гэтага віду рэкламы ў агульным прыбытку “CityDog.by”, рэдактары далікатна папрасілі не разгалошваць, хоць і агучылі гэту лічбу для ўдзельнікаў майстар-класаў (ездзіце на воркшопы!).

Спікеры падкрэслілі, што натыўная рэклама як хэндмэйд, які заўжды даражэйшы за канвеер.

“Рэкламадаўца атрымлівае кантэнт, тэмы і аўдыторыю, цікавыя яму. Пра гэта трэба заўжды памятаць і разумець, калі вы прадаеце натыўны праект на сваёй пляцоўцы”, — падсумаваў Сяргей Сахараў.