Гродзенскага журналіста Уладзіміра Хільмановіча завочна асудзілі да 5 гадоў зняволення і 40 000 рублёў штрафу

Справу журналіста Уладзіміра Хільмановіча ў парадку спецвытворчасці разбіраў Гродзенскі абласны суд. Працэс распачаўся сёлета 29 чэрвеня, прысуд прагучаў 19 жніўня. Журналіста звінавацілі паводле двух артыкулаў Крымінальнага кодэкса РБ: у садзейнічанні экстрэмісцкай дзейнасці і ва ўдзеле ў экстрэмісцкім фарміраванні.

Уладзімір Хільмановіч

Суддзя Гродзенскага абласнога суда Ігар Собалеў пастанавіў прызнаць Уладзіміра Хільмановіча вінаватым у садзейнічанні экстрэмісцкай дзейнасці і на падставе часткі 1 артыкула 361–4 КК прызначыць за гэта пакаранне ў выглядзе 2 гадоў пазбаўлення волі.

Таксама журналіст прызнаны вінаватым у іншым садзейнічанні экстрэмісцкай дзейнасці, учыненым паўторна, і пакараны за гэта трыма гадамі пазбаўлення волі са штрафам у памеры 600 базавых велічынь (24000 рублёў).
 
Паводле часткі 3 артыкула 361–1 КК суд прызнаў Хільмановіча вінаватым ва ўваходжанні ў склад экстрэмісцкага фарміравання ў мэтах учынення злачынства экстрэмісцкай накіраванасці. На  падставе гэтага яму прысуджана пакаранне ў выглядзе 3 гадоў пазбаўлення волі са штрафам у памеры 500 базавых велічынь (20 000 рублёў).

Па сукупнасці злачынстваў шляхам частковага складання прызначаных асноўных і дадатковых пакаранняў канчаткова Уладзіміру Хільмановічу прызначана пакаранне ў выглядзе пазбаўлення волі на 5 гадоў з адбыццём у папраўчай калоніі ва ўмовах узмоцненага рэжыму са штрафам у памеры 1000 базавых велічыняў (40 000 рублёў).

Тэрмін адбыцця прысуду абвінавачанаму будзе адлічвацца са дня яго фактычнага затрымання. На сёння журналіст знаходзіцца ў замежжы і прыязджаць у Беларусь бліжэйшым часам не плануе.

У судовай пастанове па справе Уладзіміра Хільмановіча, апублікаванай на сайце Вярхоўнага суда, нічога не гаворыцца пра сутнасць абвінавачання. Адно што сярод рэчавых доказаў згаданыя «скрыншоты аўтарскага блога з артыкуламі Хільмановіча», якія суд пастанавіў «захоўваць з матэрыяламі крымінальнай справы».

Самаму Уладзіміру Хільмановічу таксама дагэтуль невядома, за што канкрэтна яго асудзілі.

«Відавочна, што за маю прафесійную дзейнасць, але працу на які канкрэтна інфрамацыйны інтэрнэт-рэсурс паставілі мне ў віну, дакладна сказаць не магу», — пракаментаваў журналіст сённяшні вердыкт Гродзенскага аблсуда.

Паводле судовага выраку, здымаецца арышт з зямельнага ўчастка ў Парэцкім сельсавеце Гродзенскага раёна і з кватэры, якая належыць жонцы Хільмановіча.

Але іншую арыштаваную маёмасць, у тым ліку кватэру журналіста ў Гродне і побытавую тэхніку, вырашана прадаць дзеля кампенсацыі грашовых спагнанняў, накладзеных судом. На тыя ж мэты пойдуць і грашовыя сродкі ў суме 100,12 EUR, забраныя следчымі падчас ператрусу.

Пра тое, што супраць яго заведзеная крымінальная справа, Уладзімір Хільмановіч даведаўся напрыканцы лістапада 2023 года. Тады сілавікі апісалі маёмасць па месцы яго рэгістрацыі ў Гродне. Яшчэ праз тыдзень быў праведзены ператрус у кватэры жонкі Уладзіміра, дзе ён жыў з 2014 па 2021 год. Адтуль забралі працэсар камп’ютара, старое пасведчанне, 25 кніг, музычны дыск, паштовыя маркі, канверты, паштоўкі, буклеты, значкі, газеты. Таксама апісалі побытавую тэхніку.

На той час Уладзімір Хільмановіч ужо два з паловай гады не жыў у Беларусі.

Пра пачатак спецыяльнай вытворчасці ў дачыненні да гродзенскага журналіста Следчы камітэт паведаміў сёлета 13 сакавіка. Аднак тады ў афіцыйным паведамленні згадваліся толькі часткі 1 і 2 артыкула 361–4 (садзейнічанне экстрэмісцкай дзейнасці). З таго часу следства знайшло падставы для абвінавачання яшчэ і ва ўдзеле ў экстрэмісцкім фармаванні.