У Віцебску развіталіся з фатографам Юрыем Шэпелевым. Ён памёр 8 лістапада пасля цяжкай хваробы

У Віцебску Юрыя Шэпелева ведаюць найперш як фатографа, які шмат гадоў  здымаў гарадскія краявіды. Ён штодня выходзіў на шпацыр па вуліцах роднага горада з фотаапаратам і амаль штовечар выкладаў у сацыяльныя сеткі новыя фотаздымкі. Віцебскія краявіды, знятыя Юрыем Шэпелевым, дэманстраваліся на гарадскіх фотавыставах, а ў 2020‑м годзе прыхільнікі ягонага таленту ўбачылі  першую, і, на жаль, ужо апошнюю персанальную фотавыставу.

Юрый Шэпелеў не толькі фатаграфаваў Віцебск, але і вельмі шчыра дзяліўся сваімі фотаздымкамі з журналістамі, краязнаўцамі і ўсімі, хто цікавіцца гісторыяй горада. Ён і сам быў краязнаўцам-аматарам, шмат ведаў пра мінулае Віцебска, цікавіўся гісторыяй архітэктуры, сябраваў з даследчыкамі — гісторыкамі і мастацтвазнаўцамі. З задавальненнем рабіў фотарэпартажы з вернісажаў, сачыў за мастацкімі навінамі.

У апошнія гады Юрый Шэпелеў супрацоўнічаў з сайтам “Народныя навіны Віцебска”, апублікаваў на гэтым рэсурсе больш за 400 фотарэпартажаў і фотазамалёвак. Дзякуючы творам Юрыя Шэпелева віцебскія краявіды ўбачылі жыхары розных краін: аўтар адмыслова стварыў некалькі суполак у сацыяльных сетках, дзе публікаваў свае фотаздымкі. На жаль, новых твораў там больш не з’явіцца, але зробленае Юрыем Шэпелевым заслугоўвае самай глыбокай павагі і самай светлай памяці.