У Варшаве пройдзе трэці Кубак Івуліна

«У 2022 годзе хлопцы арганізавалі гэты турнір у знак салідарнасці са мной і тысячамі іншых палітвязняў, якія апынуліся ў беларускіх турмах ні за што, – напісаў журналіст і блогер Аляксандр Івулін на сваёй старонцы ў Insta­gram. – Год таму «Саша выйшаў», але колькасць палітвязняў не паменшылася. Зараз людзей пачалі выпускаць па памілаваннях, але ў цэлым сітуацыя не мяняецца.

У Беларусі па-ранейшаму мінімум 1320 палітвязняў. І калі ў 2022 годзе, знаходзячыся за дротам, я стаў чэмпіёнам калоніі па міні-футболе, то цяпер «жоўтабірачным» забаронена нават набліжацца да пляцоўкі. Таму мы будзем гуляць за іх.

Гучыць пафасна, але, калі знаходзішся там, неверагодна прыемна атрымліваць весткі, што пра цябе памятаюць тут».

У цырымоніі адкрыцця Кубка Івуліна-2024 паўдзельнічаюць дэмакратычны лідар Святлана Ціханоўская і міністр спорту і турызму Польшчы Пётр Борыс, паведамляе «Позірк».

Арганізатары плануюць сабраць на спаборніцтвах 24 каманды. Пра свой удзел, у прыватнасці, заявіла каманда «Белсата».

Як атрымліваць кайф ад футбола, застаючыся журналістам? Гутарка са Змітром Міцкевічам

Першы футбольны турнір беларускіх аматарскіх камандаў, арганізаваны ў гонар палітвязня Аляксандра Івуліна, прайшоў 14 жніўня 2022 года ў Варшаве. У ім удзельнічалі 16 камандаў, сфармаваных з беларусаў замежжа. Перамагла каманда Беларускага фонду спартовай салідарнасці.

Другі футбольны Кубак Івуліна прайшоў у Варшаве 19 жніўня 2023 года. На ім перамагла каманда Free SPOrT Unit­ed. У турніры ўзялі ўдзел 32 каманды з Беларусі, Польшчы і Украіны.