У Шведскім парламенце прайшоў круглы стол на тэму свабоды медыя ў Беларусі

Адным з ініцыятараў правядзення слуханняў выступіла прадстаўніца Шведскага саюза журналістаў Оса Ульсан, якая шмат гадоў на міжнародным узроўні ўздымае найбольш вострыя праблемы беларускіх журналістаў.

Падчас круглага стала абмяркоўваліся праблемы доступу беларускіх журналістаў да інфармацыі дзяржорганаў, ціску на медыя, пераследу калег за супрацоўніцтва з замежнымі СМІ без акрэдытацыі, а таксама шляхі, як з дапамогай  міжнароднага ўплыву можна выправіць сітуацыю.

У круглым стале з беларускага боку ўзялі ўдзел кіраўнікі апазіцыйных палітычных партый, а таксама намеснік старшыні Пастаяннай камісіі па заканадаўстве Палаты прадстаўнікоў Беларусі Максім Місько.

Падчас слуханняў прадстаўнік Беларускай асацыяцыі журналістаў Андрусь Клікуноў запрасіў Раду міністраў Паўночных краінаў наступны раз па гэтым пытанні сабрацца ў Мінску.